text│Sakura
元朗的老馮茶居，無論總店或大埔店都經常現人龍，受歡迎主要是點心夠晒懷舊。由老闆的爸爸馮耀榮師傅主理，他曾是鳳城酒家總廚，入行 40 多年，茶居最近仲殺入荃灣再開分店。
新店的裝修跟前兩店一樣靚，以六、七十年代屋邨為主題，將懷舊士多、山貨雜貨店活現在店內，另一邊仲有舊式冰室座位，感覺好似時光倒流一樣！
供應的點心自然夠晒懷舊味，好似鵪鶉蛋燒賣，最花工夫是先將大地魚烘乾後再磨粉，混入新鮮豬肉及新鮮蝦肉製成餡料，豬肉蝦肉比例各半，跟現今以雞粉味粉做的，大地魚的魚鮮味就是鵪鶉蛋燒賣的古早靈魂。
說到傳統，這裏的炸雲吞沒有配糖醋汁，而是正正宗宗用回舊式的五柳汁，汁醬當然是自家製，裏面糖醋紅薑、糖醋筍、紅醋木瓜、糖醋紅蘿蔔及糖醋橋頭，味道傳統。沙嗲金錢肚和咖喱魷魚亦是舊式酒家經典，前者以花椒、八角等材料醃製金錢肚，再用自家製沙嗲醬和柱侯醬製作，金錢肚索汁入味；後者的咖喱汁是師傅秘製，魷魚爽彈一點不像嚼膠！
店內仲有提供懷舊砵仔蒸飯、手拉腸粉、中式甜品，睇埋價錢，完全無投訴，定價貼近屋邨酒家價錢，包你食過返尋味！
---------------------------------------------
鵪鶉蛋燒賣 $28
經典之處是自家磨製大地魚粉醃肉醃蝦，鮮濃而不死鹹，包製手勢也不錯，吃落鬆化不死實。
老馮金沙米皇腸 $32
香滑腸粉內包着炸米網蝦春卷，原隻蝦飽滿不會奀吱吱。
老馮流沙芋泥包 $20
咬開有流心芋泥醬，醬裏有芋頭粒，甜而不膩。
魷魚肉餅飯 $35
以新鮮赤肉和肥豬肉製成，魷魚先焗後切碎，釀進肉餅裏，以舊茶居的常用瓦缽上枱。
正宗潮州粉果 $20
餡料十足，有沙葛、韭菜、芹菜、蝦米、菜脯和花生，餡料啖啖爽脆。
沙嗲金錢肚 $26
以花椒、八角等材料醃製，再用自家製沙嗲醬和柱侯醬煮，爽彈有嚼勁。
五柳炸雲吞 $30
炸雲吞皮薄脆身，味道香惹，配上酸甜五柳醬汁，是回憶的味道！
咖喱蒸魷魚 $26
魷魚蒸得腍滑爽彈，富咖喱香！
薑汁桂圓紅棗糕 $20
懷舊甜品之一，囗感煙韌彈牙，甜而不膩。
-------------------------------------------
【info】
老馮茶居
地址：荃灣眾安街 68 號荃灣千色匯 ll 期地下 G30-G33 號舖
電話：2366 8188
營業時間：8am - 10pm
備註：營業時間或因防疫政策而變更
