基本上，茶餐廳的碟頭飯都都是流於「杰撻撻」熒光汁撈飯之流，但這個恐怖的事實要終結了，因為這店嘅碟頭飯由猛料廚主理，老闆兼大廚宋師傅不單止獲名廚鮑魚阿一頒發「高級廚藝勳章」，還獲頒法國廚皇會「五星級大師勳章」及中華廚藝學院專業認可資格，炒自他手的碟頭飯係咪升價百倍先？
舖頭晚市賣正宗潮州菜，他將幾道撚手潮州嘢也放喺午市餐牌，好像滷水鵝，無 hea 做，鵝是朝早 9am 滷的，滷水膽宋師傅用了6 年，滷味鹹香得宜而且仲有香料香，堅持用高檔的獅頭鵝，水準同晚市食到的一樣，但便宜一半都唔止；仲有潮州麵綫同落足大地魚及冬菜做的足味蠔仔粥，都係潮州之味。
午市一星期供應六日，每日有 12 款即炒碟頭飯，包括炒河、蒸飯和其他客飯，一定要試宋師傅的蒸牛肉餅，用巴西西冷的頭尾攪碎加榨菜蒸肉餅，仲好有煮食智慧地用梳打汽水令牛肉鬆化，蒸出來鬆化肉汁多又無發粉味；梅菜扣肉都要試，五花腩畀師傅做得出神入化，瘦肉鬆化無渣，肥肉部分又甘香又唔食到人一口油，好食到個個都清晒隻碟。午市客客超有分量，兩份餵得飽三個人，抵食到我要收聲了！
榨菜牛餅蒸飯 $42 (連白飯、例湯或汽水)
牛肉用巴西西冷，加榨菜及麻油蒸，厚身鬆化唔會死實，肉汁豐富，牛味鮮濃。
梅菜扣腩肉飯 $42（連白飯、例湯或汽水）
師傅以磨豉醬、海鮮醬、乾葱蒜頭等做醬爆香梅菜及炆五花腩，腩肉與肥肉相間，鬆軟入味，梅菜大大粒又唔會死鹹。
潮州滷水鵝飯 $47（連白飯、例湯或汽水）
滷水鵝很入味，鵝肉帶少少肥，皮也甘香，中午時間會供應鵝髀或鵝胸位置。
鹹肉潮州炒麵綫 $42 (連例湯或汽水)
麵綫是潮州人用鹽水製，比廣東麵有嚼頭，師傅加了馬拉西亞胡椒粉炒，胡椒香甚濃，配爆得微焦的鹹肉，足味好食。
椒醬碎肉蠔仔粥 $36
用的是福建蠔仔，近期超肥美，湯底本身用雞骨及排骨煲，加大地魚、冬菜及唐芹碎煮，好甜又有大地魚香。另配一小碟自製的潮式醬肉送粥，堅正。
潮味居
地址：灣仔寶靈頓道 2 - 16A 地下
電話：2834 6669
(原文摘自《U Magazine》文：sieg、圖：Kee、Ki、Lamlam、Sky、Ken)
