這間新開的小店，人氣極盛，晚晚 7pm 後排 20、30 人唔少得，都係因為這間 cafe 裝潢的茶記，平賣酒店級西餐，當現今的茶記吃個小炒都過百，這店晚市變相性價比極高，所以街坊一樣落力排隊幫襯。
性價比高，好大原因這裏有高廚壓鎮，仲用酒店級的材料，老闆郭生年紀輕輕，在中華廚藝學院學藝 7 年，並已考獲國家技師級水平，曾在 HOFEX 及多個烹飪比賽得獎，他更是尖沙咀口碑粵菜館雲來軒的老闆之一，今次做高檔茶記都將高檔粵菜用靚料嗰套放到餐廳裏，先找來在五星級當西廚的老友掌勺，就算晚市才收 $100 左右，都用上真係有牛味有肉汁的澳洲穀飼牛肉，仲分埋肥牛、西冷、T 骨扒同牛柳幾個部位，仲有新西蘭的羊架、德國豬手、加拿大藍青口、挪威三文魚，連菜都係本地種植的沙律菜，當正高級西餐做。
連烹飪法都高檔，忌廉汁真係用鮮忌廉製而非用罐頭開、黑松露汁用鮮菌推、扒類更會先烤後焗，唔會求其上枱，連分子料理嘅泡沫都用埋，花園餐廳價錢，但有酒店西餐享受，咪就係贏性價比高囉。雖然推介它的晚餐，但不得不提午餐都超抵食，$39 就有慢烤的豬柳，相當有幫襯空間啊。
焗豬柳配西班牙野菌汁 $39
(午餐，配飯、薯菜或意粉，餐湯及飲品，黃牛加$9)
全場最平的午餐，但豬柳用澳洲貨，先烤後焗 10 分鐘，嫩滑唔會嚡，好多打工仔叫。
板石燒粗黑椒極品牛柳粒 $108 (配珍珠飯、餐湯及飲品)
牛柳粒屬新西蘭穀飼級，嫩滑有味，黑椒汁裏有粗粒的黑椒，放在鐵板上醬汁滋滋作響，熱辣香口。
黑松露加拿大藍青口忌廉炒意粉 $90 (配餐湯及飲品)
藍青口質素高，肥美無渣，意粉煮得彈牙，而且每條都被忌廉汁包着。
香烤紐倫堡脆皮鹹豬手配士多啤梨汁 $128
(配餐湯及飲品)
豬手用德國或新西蘭貨，肉嫩沒有豬羶味，先燒後烤焗，豬手煮得透心，醬汁酸酸甜甜，很醒胃。
法式香燒羊架配野菌汁 $118
(配飯或薯菜、餐湯及飲品)
羊架也是澳洲貨，火候適中，切開有豐富肉汁，配矜貴的黑菌醬汁，菌味濃郁。
香煎挪威三文魚黑松露意大利飯 $128 (配餐湯及飲品)
有少少分子料理做法，上面配個用忌廉打成的泡沫及香檳南瓜汁；意大利飯做得有心，以忌廉炒香慢煮，有少少 al dente 感覺。
皇后冰室
地址：旺角西洋菜南街 194 號
電話：2390 0660
(原文摘自《U Magazine》文：sieg、圖：Kee、Ki、Lamlam、Sky、Ken)
