小店老闆與北海道的「楠」料理老闆稔熟，不但用上小店的名字，連食材也靠這位買手入貨，日本人同日本漁民先有偈傾，所以星期一至六都可以空運來自北海道、九州福岡的靚海鮮，連喜知次都賣得比別家便宜兩成，間中豪一次都可以接受。連煮法也有獨特之處，除了可如一般的日本料亭般做刺身或燒之外，更提供「荒煮」的汁煮法，魚會先火炙後放到淡醬油裏煮，想不到煮過後的喜知次，肉質滑過石斑多多聲。
嫌喜知次大路，不妨試下更抵食的鯥魚，之前入黑鯥，近期至 7 月則是赤鯥當造，赤鯥雖然稍稍不及喜知次矜貴，但體積比喜知次大，價錢又平過喜知次，而且魚質頗佳，肥美帶甜、油質重無渣，而且非常難得地這條白身魚都有突出的清新魚味，用來做刺身，師傅會好有心地將一部分做薄切，另一部分則厚切火炙，一魚有兩款口味。刺身壽司這期以貝類為主，主打九州來的日本象拔蚌白見貝、日本蟶子馬刀貝、岩蠔、北海道馬糞海膽等，遲些更有新鮮的鰹魚及北海道的紫海膽。
同行若有人唔食刺身，也有和食、炸物、天婦羅及串燒等，小店用料不差，雞肉用宮崎的、豚用鹿兒島黑毛豬、牛則有宮崎及鹿兒島和牛及安格斯牛，廚師更頗為有心，早前以信州梅及南高梅配中國的玉冰燒及燒酎自家釀製 5 款梅酒，下個月就有得飲，老闆說會讓客人免費試飲，試埋先柯打。
楠料理
地址：灣仔皇后大道東 202 號 QRE Plaza 28 樓
電話：2891 0876
(原文摘自《U Magazine》文：sieg、圖：Jay)
