不過此店做法就略加改良，用廣東傳統砂鍋，亦不像國內般可以自選餸料，反而配上港人好鍾意的土匪雞翼、話梅骨、生熟肥牛同炸豬扒等。
別以為是小店就做得求其，湯底是老闆 10 磅豬骨加上雞殼、白胡椒、洋葱、京葱及印尼南薑做湯膽，每天又重新再加材料熬，每煲湯熬夠 24 小時才用，每日不煮多過 50 煲麵。湯很老火很鮮甜，而且質地帶稠，原來老闆還加了少少忌廉，令湯更 creamy，配不易煮腍的台灣入口刀削麵，麵條過完冷河超爽彈，區內唔少街坊都 Like；唔鍾意刀削麵的，可揀老闆從越南入口的河粉和檬粉，前者同廣東河粉唔同，口感實在有少少沙河粉感覺，好夾豬骨湯。
餸料也做得有誠意，雞翼和話梅骨都自己醃自己煮，連避風塘魷魚、吉列豬扒、沙薑雞腳及菜肉雲吞等都是自家製，晚上還會有川味雞煲、牛腩煲和海鮮煲等供應，價錢超實惠，好有理由去試吓。
鶯記砂鍋麵
地址：大角咀鐵樹街 16 號富多來商場 1 期地下 10 號舖
電話：6570 7815
(原文摘自《U Magazine》文： sieg、圖：Ki)
