這裏由跑馬地著名街坊小廚的元師傅主理，當年憑一道「拔絲咕嚕肉」紅遍飲食界，今次做雞煲，一樣有 Gimmick 細心位 ── 就是將雞件起骨，食雞煲食到啖啖肉，好似「皇帝」咁歎。一煲「皇帝級」的起骨雞煲，索價近 $400，但真係物有所值，元師傅腌尖，只用「即日鮮雞」，麻黃雞隻凌晨 4、5 點在國內劏咗，就即刻運來香港，下午到舖醃製，所以雞味好鬼濃，雞隻重達 2 斤重，就算起晒骨，一煲 4 個人都食得飽，計返又唔算貴喎。
雞煲的麻味、辣味與香味 Balance 得唔錯，唔會一食就辣到你跳舞，反而先來雞鮮味、甜味，辣味慢慢滲出嚟，食得十零分鐘嘴仔又會感到發麻，雞煲即叫即炒，上枱時雞件脆脆有肉汁。當然，慳儉的也可吃平民有骨版、雞翼雞髀或起骨雞翼雞髀 3 款。
料也有誠意，最特別係低糖芝士蝦丸，專登用低糖芝士做，女仔食都唔怕肥；另外燒芝士包都係正嘢，雖然係入貨款，但街外好少有，真係有芝士鹹香。另外，丸類、雲吞、滷水豬大腸，仲有花蛤、麻辣鴨舌、沙薑雞翼等餐前小食都自己整，牛肉水準又不俗，整體得分 85 分以上！
大力棒棒麻辣雞煲
地址 : 尖沙咀赫德道 4 號 The Hart 4 樓
電話 : 2369 9825
(原文摘自《U Magazine》文：sieg、圖：Ken、May、Sky)
