呢間雞煲「我有我風格」，三位老闆講明即使在重慶根本搵唔到香港所謂嘅「重慶雞煲」，所以索性自家研究鍾意嘅口味。這裏的雞煲 sell 雞味鮮同口味有層次。坊間的雞煲通常以勁辣、勁鹹的味料來醃蓋雞件無味的事實，但這裏就反其道而行，唔會辣到食唔到味，這裏選用重逾 2 斤的三黃雞，貨源同稻香、泉章居一樣，煮好的雞件件件脹卜卜，肉多骨少，皮夠滑。每煲雞都分開用薑汁醃過夜，有客落單才以花椒、八角、草果、四川及湖南辣椒等近 30 種材料煉出來的紅油以明火把雞件逐份煎香，鎖緊雞件肉汁，上枱後，就算點煮點煲都唔會變韌。
煎好的雞連燒紅了的黑色生鐵鍋上枱，熱辣辣到「滋滋」作響，又唔會浮起一層厚厚的紅油，吃來有薑汁的雞、紅油煎出來的香辣與麻感，烹調時又加了冰糖，帶甜甜的味道，味道有層次，識貨嘅都唔怕行多幾步來吃。
雞煲掂，連配料都唔差，這裏有勁罕有的「封門牛柳」，呢塊牛肉就矜貴囉，在橫膈膜下面，一左一右只有 2 條，加埋都唔夠 1 磅，爽得嚟甘甘地；連帶西班牙黑豚肉、廣島蠔、手打丸都唔錯，平均幾高分。
陸陸雞煲火鍋
地址 : 旺角奶路臣街 33 號地下 F 舖
電話 : 2392 4966
(原文摘自《U Magazine》文：sieg、圖：Ken、May、Sky)
