最近一連 3 間新奇雞煲店彈出，有的大玩變種雞煲，亦有大廚在製法上大搞新意思，甚至將雞煲配點心食，食雞煲的配套也愈趨完善。
作為雞煲粉絲，應該嘗新還是念舊？搵咗一星期食 3 餐雞煲的 die hard fans 即時試食點評！
瘋狂食雞煲往績：
‧ 一星期最少食 3 至 4 次。
‧ 大小雞煲名店如一品、來來、隨變、大煲皇等統統食過晒。
‧ 去荃灣食雞煲，等半粒鐘仲未有位，於是即刻飛的去紅磡分店，去到又係無位，結果外賣雞煲，再飛的回家開餐。
‧ 外賣雞煲吃剩的醬汁統統留起，第二餐用來煮烏冬吃，醬汁一滴不漏。
‧ 屋企人本來不吃雞煲，受她影響，現在全家上上下下都變成雞煲粉絲，每逢周末家庭聚會必吃雞煲。
Ricky Cheung
「雞煲香料一定要多，味道要麻、辣兼備。食完雞肉加湯打邊爐，配料唔使好靚，因為湯底濃味，配料太靚反而浪費，食內臟就最夾喇！」
Kit Mak
「味道要夠辣，芫茜、葱等配料要夠多，先可帶出香味。最重要是加湯後，味道依然保持濃郁，如果一加湯就淡而無味，就不合格。」
劉健威
「食雞一定要有雞肉味，食濃郁雞煲，就要用鮮雞肉先好，否則醬汁都蓋過了雞肉味，又點會好食？」
變奏雞煲 X 點心 出位食法
雞煲熱潮有幾勁？看看土瓜灣人氣急升的二哥點心店，都轉戰雞煲就知。點心店開業 3 個月，雄心壯志的老闆張先生已決定再下一城，10 月開雞煲店。點心店早贏得街坊口碑，所以雞煲店早上會供應點心，午市則以魚湯飯做主打，晚市至凌晨則是雞煲主場。既然有靚點心，老闆乾脆破格用點心作為雞煲配料，暫時會以蝦餃、燒賣、牛肉球及鯪魚球配雞煲，但若食客有其他心水，亦不妨向老闆提出，自己玩點心 × 雞煲的 mix & match。
新店另一估佢唔到的 gimmick，是變奏雞煲口味！有 3 個，奇味雞煲即麻辣味的重慶雞煲，還有豬肚雞煲及椰子雞煲。前者製作工序超繁複，大廚每日到街市買新鮮豬肚，以薑、葱醃過再啤水，熬湯半小時至 5 成熟，再將已醃好的雞件釀入去，用鹹水草紮實再燉 3 小時才完成，鮮香突出，湯頭好甜。椰子雞煲則用新鮮椰汁、椰肉配淮山杞子做湯底，上桌將之煲滾，便可加入雞件，待滾起後熄火焗 8 分鐘，椰汁底好香濃，雞肉滑嫩無比，食完雞後再開火打邊爐，配料滑溜溜！
除了點心和大路火鍋料，海鮮亦特別靚，因老闆家住赤柱，跟漁民稔熟，可取得最新鮮最肥美的貨色，龍蝦、龍躉鮮蹦活跳，滿足海鮮迷。
二哥雞煲粥底火鍋
地址：土瓜灣漆咸道北 495 號
電話：2333 8438
紅油煎雞 自爆不正宗
旺角的陸陸雞煲自稱「不正宗」，皆因它有獨門炒雞手法。坊間的店都採中式大兜亂炒法，陸陸的師傅因為做過西餐，改以煎封，將雞肉平均攤放在鑊上，煎至兩面金黃，比起走油或炒的做法更能封鎖肉汁。醃雞也有自家一套，逐隻甚至半隻雞醃，特別入味兼均勻；更選用黑鐵鍋盛載，上桌前用明火將鐵鍋燒紅 10 分鐘，令保溫效果更顯著，食到最後一件雞還是滾熱辣；怕熱鍋燙手嗎？又在爐上加隔熱墊，穩固鐵鍋位置，每一步都想得周詳，配套細心。
另一個「不正宗」位，是味道。老闆張先生解話：「食雞煲，追求超級麻辣無意思，亦唔符合香港人口味。製作時大家都會用花椒、四川辣椒等香料，但味道上我哋認為豐富層次比一味麻辣更重要。」這個層次，是甜→辣→麻→甜，食完之後嘴角還剩下陣陣花椒的麻香甜味。
能做到如此滋味，就靠 3 款自家炒製的醬料，分別帶出香濃的鹹鮮味、辣味及麻香味，其中以麻香及鹹鮮醬佔最多分量，帶出層次。此外，店中自家煉製的紅油亦是美味關鍵，用花椒、八角、草果、四川及湖南辣椒等近 20 種材料，慢火熬 5 小時而成，用紅油煎雞，夠晒惹味，亦令辣香緊緊包裹雞肉。
至於配料，有少見的黑毛豬腩、封門柳牛肉等，前者油香爆燈，後者牛味香濃質感腍滑，都算特別；加上室內環境甚為雅致，怪不得只開業兩星期，已晚晚爆場，還有不少回頭食客，雞煲 fans 值得一試。
陸陸雞煲火鍋
地址：旺角奶路臣街 33 號地下 F 舖
電話：2392 4966
嶄新秘製汁底 甜香辣
雞煲離不開麻與辣，坐鎮新店亞南雞煲的大廚曾在內地工作十多年，對重慶雞煲醬汁做法瞭如指掌。為求突出，他重新鑽研配方，在常用的川椒、青麻椒、指天椒及茴香粉等香料以外，加入來自四川的沙參醬及沙茶粉，辣得來多添香甜惹味。食落的確香郁，醬汁不一味死辣，即使辣唔起的客人都頂得住。新店另一賣點是除了冰鮮雞，還選用嘉美少爺雞，新鮮雞不但肉質鮮嫩，還有齊雞膶、雞腎及雞腸等內臟，配辣湯底風味更勝一籌。
食完雞煲，即可加豬骨湯打邊爐，這店火鍋料不算特別，勝在價錢相宜；反而小吃最吸引。豬肚、豬耳及牛拌以麻辣汁底，有生蒜、麻油、鎮江醋等調味，愈食愈開胃。佐酒則有惹味的椒鹽鮑魚、脆皮牛腩，是啤酒的好拍檔。不喝啤酒，推介青瓜豆漿，將原條青瓜跟豆漿攪拌，一杯足有一條青瓜，清新滋味，是解辣首選，晚市第一輪已告售罄。
亞南雞煲
地址：太子花園街 211 號地下
電話：2392 6100
(原文摘自《U Magazine》文：黃茵、圖：Ki、Chow、Jay、Sky)
