中環人茶版 Starbucks
咖啡連鎖店開得成行成市，外賣一杯 latte 去開會變得理所當然，中環人比別人多個選擇，他們可以外賣一杯 tea。Leaf Tea Boutique 大賣快捷優質，正正是茶版星巴克，紙杯盛茶，即買即飲，店主 Andrea 亦運用其中醫知識，調配出20 款養生健體的好茶，任何時候都飲。
翻開 Tea Menu 揀好心水，茶藝師便從身後的「百子櫃」取出茶葉，即席泡茶，幾分鐘就飲得，拿着紙杯離去，無人估到杯內竟是祁門紅茶/ 印度阿薩姆紅茶 / 伯爵茶 ……
快不等於求其，店內的四十多種單一產地的茶葉，來自中國、印度、斯里蘭卡、台灣等，全是 Andrea 花了兩年時間搜羅，並直接跟茶園入貨，樣樣揀手：「每種茶只揀一款，唔會有兩種 Earl Grey、兩種普洱。單一產地的茶，才可試到它的原味。」
Andrea 愛飲茶，亦愛它的功效：「食滯最好飲紅茶，想清熱綠茶最好，要寧神安眠就揀花茶。」飲茶講口味亦講體質，是以她去修讀中醫課程，為客人推介合適的茶。Andrea 調配名為 Impression 的茶，就有養生效用，最受歡迎的是 B & B，以大麥配牛蒡，去濕清熱，沒有咖啡因，更可放心多飲。
Leaf Tea Boutique
地址：中環威靈頓街 83 號 LG 店
電話：2543 3028
上樓歎綠茶Mocktail
看見「茶居」二字，大概會認為是坐定定泡茶的地方，但這「川善茶居」肯定係估你唔到之類。一入去，幾張 ghost chair、英式花花布椅好搶眼，旁邊同時放上酸枝傢俬，大玩中西合璧。餅櫃裏 Cupcake、Muffin、Apple Cake、Banana Cake 齊齊晒冷；外邊的小露台，最好來晒晒太陽，氣氛格局似足樓上 Cafe。
到底葫蘆賣甚麼藥？原來是主打日本茶及中國茶的茶室。店主 Sinmei 既做茶葉批發，亦曾在英國開設日式茶室，還自創多款抹茶 Mocktail，吸引外國人試飲。店子的必試 item 首推 Matcha Soul，以日本抹茶 x 有機豆奶，還有蜜糖杏仁片桂花，甜甜香香；Matcha Sunrise 以抹茶混合鮮橙汁，多了分酸甜。
若換上普洱茶做主角，同樣有驚喜，像 Vintage Berry，就用上普洱茶膽，加入藍莓、士多啤梨及紅莓等，飲普洱也唔再老土！傳統點可試「茶道賞」，大紅袍、鐵觀音、普洱、鳳凰單樅等，用紫砂壺自斟自飲，閒適舒暢。
自家製甜點日日鮮製，Earl Grey Cupcake、普洱 Cupcake 等為味蕾延續茶香，Blueberry Muffin、Apple Cake、Banana Cake 不含蛋奶成分，全素食者都食得。
川善茶居
地址：上環永樂街 50 號昌盛大廈 5 樓
電話：3690 8238
名店中型格茶吧
很久沒去尖沙咀，這裏任何時候都多人，諗起就怕！但「大隱隱於市」，這裏居然有片叫 The Library Café 的綠州，置身在名店連卡佛一角，別說未被遊客攻陷，連本地人都像沒察覺。
別小看這角落，地方雖小，卻由着名室內設計師 Andre Fu 操刀，一張大雲石 Common Table，旁邊放幾張木，自己一個自斟自飲，又或者跟朋友自成一國都得。最愛它的高樓底，看天花板吊着高高低低密密麻麻的燈泡，有型！聽說 Andre 的設計意念來自 1950 年的紐約，難怪看起來別有外國的韻味。
不負「連卡佛」大名，餐具茶壺是 Alessi 出品，杯碟選英國 Steelite 的，飲茶的話，選擇有英國名牌 Fortnum and Mason 及法國名牌 Boissier，共十多款口味，歎杯茶唞唞氣，血拼前後皆宜。
食物選擇不算多，已夠滿足大家，自家製 Cupcake 上的朱古力片，印有今季鞋款，又潮又好味；想飽肚有沙律及三文治，Chef May 喜歡將西式 mix 日式，既有日本蛋、枝豆、麻油、沙律醬，又有意大利煙肉、芝士等，配搭多元化。飲茶後繼續濕平，買點 Fortnum and Mason 的餅乾茶葉、Boissier 茶葉、法國 PPP 橄欖油，還有清酒餐酒香檳等，一過做豪客癮。
The Library Café
地址：尖沙咀廣東道 3 號連卡佛地下層
電話：2118 4530
日街潮物店
Kapok 向來賣潮物，幾年前在天后開業，已受型人熱捧，後搬店往灣仔進教圍。兩年多前，更在附近日街開分店 Kapok on Sun Street，兼有 Cafe Corner。
入到店內，被袋子銀包手錶眼鏡文具等包圍，難免會奇怪，店子為何賣起茶啡來？負責調製飲品的 Willy 話：「Arnault（法國人店主）一直想開 Cafe，於是找我合作，在這裏完成心願。」
這角落規模雖小，但茶類選擇卻多，揀選法國 Betjeman & Barton、法國 Lov 及美國 Steven Smith 等品牌，供應四十多種口味，咖啡即被打入冷宮。飲茶有杯裝有壺裝，還冷熱俱備，更可買走邊行邊飲，體貼得過分！
想配些茶點，提議你星期五至日及公眾假期前來，有 Cupcake、Brownie，全由一位印度媽媽及其兒子親手炮製，平日來雖沒這口福，亦可即場買點比利時 Dolfin 朱古力或鳥結糖，當作是給自己的小甜頭。
Kapok on Sun Street
地址：灣仔日街 3 號地下
電話：2520 0114
星街法國茶
法國人老闆兼大廚 Patrick，對同鄉靚茶 Mariage Frères 推崇備至，當初開餐廳時已供應這茶，還認真的跟茶商揀選最受歡迎、最適合本地人飲的茶，口味還要多元化，網羅紅茶、黑茶、綠茶、花果茶等，連同招牌貨 Marco Polo、Earl Grey Imperial 在內，約有 10 款選擇，而堂飲不過每壺 $35，好抵！
收得平，餐廳也沒欺場，棄茶包而用茶袋盛着原片茶葉，茶味更醇厚。靚茶從早到晚供應，而一到下午茶時間，更設 Afternoon Tea Set，包茶啡及指定甜點，為食鬼定必滿足！
有別於英國人，法國人愛以甜點佐茶，不妨一試 White Chocolate Apricot Compote 及 Orange Chocolate Cream Brulee。特別一提，店子設有免費 WiFi，坐在落地玻璃窗旁，呷啖茶，邊上網或邊看街景睇型人，同樣寫意！
Chez Patrick Deli
地址：灣仔星街 3 號地下
電話：2527 1408
(原文摘自《U Magazine》文：Pam 圖：Ken、Lam Lam、Sky、Paul、Suki、Chow、May)
