唯靈是順德人，十四五歲跟潮州細叔伯去食潮州菜，當年潮州菜都集中在西營盤的三角碼頭，而南北行生意人去食潮州小菜的「天發」是當時得令的潮菜館，最叫唯靈懷念的是沙嗲牛肉爐，當年是以將盛着沙嗲汁的塘瓷兜放在炭爐上，好似打邊爐咁灼牛肉，三個大洋有五塊肉，潮州翅都係一蚊碗，真材實料，限量供應。紅噹噹的螄蚶最經典，放在大湯碗，沖入滾水，螄蚶剛剛開口，要帶血先叫好食，「依家唔敢食喇，始終食材無以前咁好。」唯靈慨嘆。
復刻失傳潮菜
這家位於鵝頸橋街市後面的潮州菜小店，午市供應客飯、滷水打冷，門前更設外賣，看似平平無奇，裏面卻藏身了一位對傳統潮菜不離不棄的宋炎坤師傅，下至滷水、醬料，上至紅燒大鮑翅都一手包辦，晚市有不少食客都識點叫招牌鵝肝作前菜，煎水瓜烙、胡椒豬肚湯 …… 其實宋師傅的實力豈止於菜譜上的大路潮州菜式，叫他使出幾道失傳潮州菜，韭菜盒、蘿蔔扎、雜魚煲，大都工多利錢薄，宋師傅將之復刻，實令不少老饕非常懷念早幾十年潮菜興盛的風光歲月。不再是老馮的炸蠔餅、滷水拼盤，而是預訂別處難尋的失傳懷舊潮菜，幾咁威！
75分以上有實力
唯靈吃着宋師傅炮製的傳統潮菜，要他打個分數，「我會畀 75 分以上，只礙於食材關係，已盡了最大努力。」當中最欣賞雜魚煲，這道非常家常的菜式，隨意但魚湯味好濃郁，眼見唯靈連喝兩碗，就知此言非虛。而考手工的韭菜盒更是他未曾嘗過，「韭菜粿就食過，呢個好食，好手工。」，開胃前菜蘿蔔扎裏的土魷，味道酸咪咪，原來是生吃的。而見真章的方魚芥蘭雞球，足見刀章的雞球，而非雞片般欠口感。
其實，漸漸失傳的潮州菜有很多，唯靈也有不少懷舊潮菜想回味，如鹹菜門鱔頭或大黃門鱔、酸梅排骨鯉魚煲，希望宋師傅可以遲些為他一一重現這些失傳菜式。
潮味居
地址：灣仔寶靈頓道 2-16A 寶靈大廈地下 D 及E 舖
電話：2834 6669
(原文摘自《U Magazine》文：飛、圖：林思勁、suki、陳家維、程佩媚、邱鴻基)
