大件夾抵食 家庭式火鍋
出外打邊爐唔一定吓吓二百幾蚊位，行入這平區就可以百多元搞掂，而且食物的質素媲美骨煲皇、靚煲皇等區內名店，抵！這間家庭式經營的火鍋店在區內已有廿多年歷史，不過價格上調速度甚緩，是區內人平食的 best kept secret。
小店的皇牌是手切肥牛和海鮮，唔好以為間間手切肥牛都一樣，這裏的牛肉是老闆靠人脈網絡取來的最靚貨色，色澤深、有網紋而且油脂潔白，是每天於屠房取來的頭輪靚貨，用來打邊爐夠腍滑之餘，還有澎湃的牛脂香，最細心係牛肉都是有柯打才切，不像坊間的火鍋店貪方便，一早將牛肉切好一份份放入雪櫃，雪得耐有雪味又抽乾肉汁。海鮮方面，由於店主妹夫本身是海鮮供應商，親戚上頭自然日日有靚貨，貨的質素不會參差不齊，近期必吃象拔蚌仔、鮑魚仔、蟶子、帶子、肉蟹和膏蟹，價錢比其他店略平 10-15%。
幫襯的另一理由是大件夾抵食，小店以家庭式經營，餃類、丸類都是自家製，全部足料，好像鳳尾餃就用新鮮的海蝦包，裏面又少肥肉，成 2/3 粒乒乓波般大小；牛丸、墨丸也分別用本地黃牛的肥肉和墨魚頭打成，完全無溝粉，真係食到牛味、墨魚味，實屬難得，加上份份火鍋料都大份，細食的話叫幾碟已經飽到翻艇！
肥強海鮮火鍋酒家
地址：大角咀埃華街 72-74 號地下
電話：2789 1839
廚藝高材生X大澳漁民 一人魚邊爐
同樣是茶記格局的「漁民樂」隱於橫街，不起眼，食物水準卻不俗，更屬區內前衛小店，專做一人前的健康魚湯邊爐。店主本身是街坊，見區內公公婆婆漸多，又見女孩子怕肥又為食，於是搞魚湯火鍋。別看店主年紀輕輕，其實他和拍擋是廚藝高材生，兩人都在中華廚藝學院畢業，繼而在迪士尼酒店中菜部工作 5 年，加上拍檔本身是大澳漁民，搞起魚湯火鍋來自然手到拿來。
火鍋湯底都用上魚湯，魚味很濃，質地稠身，唔食火鍋飲湯都值回票價。湯底選用鰂魚、鯇魚骨及鳳尾魚骨，再以 5 份水、1 份魚的比例用 4 小時熬出魚湯，熬湯時間夠長，魚肉煮到出晒味，加上部分魚骨都融在湯中，充滿骨膠原，湯頭奶白似足豆漿，魚味爆棚又健康。另一大澳漁民店主，跟漁民和供應商稔熟，故每天返到不少無瘀傷、肉質又滑又爽的時令靚魚貨，近期啱季靚魚有桂花、海鱸、盲鰽、加州鱸、黃腳、大頭魚及火點等，原條切件打邊爐，味道最夾。一人前分量，唔使夾埋大班 friend 先有得食。
唔食火鍋咁 heavy，可選魚湯米綫，湯底跟火鍋一樣，師傅更特別用上通心的米綫，就算浸在湯中，中空的米綫會滲滿魚湯，吃時等於邊吃邊飲魚湯；想魚味再濃啲，更可因應個人喜好揀上述的靚魚配米綫，魚骹、魚嘴、魚頭、水潑及魚尾等部分任選，嗜魚人士必試！
漁民樂
地址：大角咀中匯街 35 號地下
電話：3486 4642
超彈性平食拼鍋
此乃大角咀經濟火鍋之選，即使小店不起眼，都日日爆滿，全因為此店本身價錢平，蔬菜類 $18，牛柏葉、鯇魚、水魷等大路火鍋料才 $28 一碟，再上一等級的魚頭、鵝腸、花雕雞、桂花蚌等賣 $68、$88，最重要是店子十分慷慨，幾乎所有配料，不理平貴加少少錢都可以雙拼，兩個人來打邊爐都可試多幾款。而且不會將貨就價，海鮮用即日鮮，也有手切本地牛肉、金錢、日本帶子及嘉美雞等材料，深受街坊歡迎。
文成記
地址：大角咀角祥街 41 號地下
電話：2392 2242
超人氣辣上癮香辣火鍋
翻 hit 大角咀邊爐的功臣一定非他莫屬，這間由傷心酸辣粉踩過界開設的火鍋店，一樣 sell 重慶正宗，同周街麻辣鍋最唔同的，是它加了牛油煮成，加上用上 6 種由重慶辣椒及香料、連炒香的辣椒及自製的豆瓣醬烹調近 2 小時，再加豬骨湯，牛油用牛脂肪加香料精煉得來，加上豆瓣醬味道獨特。每次煮完麻辣油後，他們會把部分收起來做「老油」加辣椒等再煮，這鍋就有種獨特的香辣味，拿着 $30 以下的的士單更可以向店方取回現金，每枱可 claim 最多兩張單，位置蹺腳都變方便。
傷心鵝掌門麻辣火鍋
地址：大角咀棕樹街 2 至 20 號榮富苑地下 10 至 11 號舖
電話：3146 5632
(原文摘自《U Magazine》文： sieg、圖：Kwan、Ray、last、Kee、May、Lamlam)
