星級食家：milkdragon
食家簡介：我是披著狼皮的羊！我會寫好個食評！編輯推介，會員推薦，同樣高興，以食會友，不為名利，多多指教。
一年一度既煲仔飯時間又到了，每年我不是12/24就是12/31黎，貪佢放半日，黎到唔駛等位。雖然坤記有得訂位，但店仔細細等位少不免，是次在幾日前已訂位，但黎到竟然check唔到我地個名，真係灰晒。伙記循例問下我地係咪訂左分店，仲幫我地打埋過去，真係好服務，但正所謂「唔食都知唔好食」，其實我又點會去隔離鋪呢。
好在伙記見我地唔似無訂到，同我地講如果無人黎就俾個位我地坐，等左五分鐘度，我地就入去坐了，否則我老婆大住肚係度吹風，我真係罪該萬死。
一坐底例牌攻略法是極速叫定煲仔飯，要知道炭爐煲仔飯除左好食，另一特點就是「慢」，叫定再諗食乜餸都仲桌桌有餘。
果然，叫左煲仔飯，再叫個沙嗲牛肉炒芥蘭，成碟食晒個煲仔飯都未黎。沙嗲牛肉炒芥蘭很夠熱，蒸氣狂升，在咁凍既天氣底下，自然食得開心。芥蘭很新鮮，嫩得黎一ｄ渣都無；沙嗲香但不辣，牛肉也夠嫩，我相信我揀老店而不揀新店是正確的，因為師傅，還是這裡好。
千呼萬喚煲仔飯，等了45左右先黎到，香味依然。今次叫了排骨滑雞煲仔飯加蛋。呢度係自己加豉油的，落既時候，「渣渣聲」在刺激我每一個味蕾。
食過幾次，還是覺得滑雞最好味。雞很滑，焗在煲仔飯裡一點都不鞋；第一次吃的排骨竟然也有驚喜，肥瘦均勻，剛熟的感覺很好；忘了叫蛋另上，焗係入面差唔多成個鐘已變熟蛋，真失策。
最後的飯焦水準依舊，好此道者一定餵得飽你，因為成個煲底都係飯焦，秘訣是千萬不要手痕自己爬鬆ｄ飯，由得佢放到咁上下，飯焦自然形成。
唔駛搵高登起底組幫手，煲底形狀既飯焦非常易「起底」，煲仔飯都可以食個「照鏡」？呢度可以輕而易舉做到。
最後留意到，我地個煲同隔離個煲是不同的，是新煲和舊煲之分，可能是我迷信，我還是覺得新不如舊，就連煲，都一樣。
俾錢時，多謝阿姐俾個位我之餘，也順道講左句：「我每年呢個時候都黎的」，阿姐開心之餘，反問一句：「一年先黎一次？」，無法啦，住得遠，而且如果唔係六點黎，等位都等到我變化石囉…
推介菜式：排骨滑雞煲仔飯
用餐日期：2010年12月24日
食家評分：
味道*****
服務*****
環境***
價錢****
坤記煲仔小菜
地址：西環皇后大道西263號和益大廈地下
電話：2803 7209
