星級食家：唔食唔肥
食家簡介：乜都放入口，想減又減唔到，食左先算！
由於南瓜兄近月春風得意，加上某原因，便找個機會請小弟食飯，雖然是朋友間的飯局，瓜兄依然找來一間有水準的食肆，真的要說聲多謝。
大埔舊墟說易去又不是，在太和站行過去，沿路問人，左兜右兜，白行不少冤枉路，睇睇錶，十五分鐘行程，足足花了過半小時。
閒日店內客人不多，門面是有點冷清，一行三人佔了一張六至八人檯亦無問題。
呻著南瓜帶來的紅酒，菜式是南瓜一早諗定，反正是人家請的，自已也不用費神…..哈哈！
魚飯：即是平日常常食到的凍烏頭魚，今次來貨真的不錯，魚肉滲出絲絲黃油，非常鮮味，蘸點少許普寧豆醬一齊食，更是食過不停。
春菜腩煲：春菜跟腩肉炆得入味，說是汁，倒不如當湯喝，鮮甜可口。腩肉毫不肥膩，咬落更有少許彈牙。
鹵水雙併：鵝片併鵝腸，前者由於當做中，食落肥肉，肉質幼嫩香濃，紋理清晰，不過後者似乎淥得過火，口感是有點韌，而且脂肪去得太清，少了一層肥美的感覺，有時候覺得雞腸比起鵝腸更可口。
金不換炒薄殼：雖然薄殼個子真的細得可憐，食起來又真的幾麻煩，有時貪方便，一口氣放幾粒入口一次過食，用上金不換來炒，大概是泰式的處理手法，的確非常惹味，
蔥花炸蠔爽：一般潮州菜館，大家都會選蠔餅一類小菜，但店方這道蠔爽，看得出廚師肯花時間來做一道菜，每粒蠔都是獨立蘸上漿粉再炸，所以大家不會食到幾舊舔埋一齊的情況出現，而且時間掌握得準，沒半點多餘的油份，之後再用椒鹽手法處理，瀝油清，蠔肉爽，是一味難得的潮州菜。
菊花石榴雞：但凡有師傅坐鎮的店鋪，總會見到的手功菜，個人認為蛋白皮是否夠嫩，提起時會否破穿，都是這道菜要注意的地方。用料大家都是雞肉粒，荀粒之類的餡料，這兒至少不用預訂，已經比起別處優勝。講真，除了茨汁濃烈了少許外，論味道及搓功是水準以上。
汕頭炒麵線：用韮菜，腩肉絲，冬菇絲及蝦仁一齊炒，夠鑊氣又熱辣辣，而且好乾身，不會油淋淋，碟底無油，看來廚師在對火侯的處理上是有一手。
清心丸：又是潮州店常見甜品，之前的肉類及炸物，似乎油膩了點，來一個清甜的糖水就最好不過了。
p.s：離開時見到師傅坐在大門前休息，真覺得為他有點不值，一間有水準的食肆，師傅又肯花心思做菜，就此屈在一角，客人又不多，能有機會，相信會攪次飯局，讓多些人認識一下。
推介菜式：金不換炒薄殼、蔥花炸蠔爽、菊花石榴雞、汕頭炒麵線
用餐日期：2010年10月04日
食家評分：
味道****
服務****
環境***
價錢*****
潮州冷小炒
地址：大埔舊墟直街美利大廈地下A-2號舖
電話：2666 0372
