Sweet Monster 新出嘅怪獸冬甩系列一共有 6 款不同口味，包括 藍莓、曲奇、檸檬、綠茶紅豆、椰子以及小紅莓，不同口味嘅冬甩亦會跟配不同冬甩餡料及醬料，配搭非常有心思。分量細細件，唔覺好 heavy，仲可以加錢配雪糕，冬甩每個 $22，配雪糕 $39，12 月 1 日起食得到喇！
藍莓怪獸冬甩
同平時食開嘅冬甩好唔同，冬甩係焗的，口感似鬆餅、蛋糕多啲！內有藍莓果肉作餡，外面有一層脆皮朱古力以及藍莓醬，一次過食到 3 種不同層次，好豐富！
配埋呢個原味雪糕一齊食，更滋味！
【抹茶狂熱】 韓粉注意！O'SULLOC 出抹茶朱古力
綠茶紅豆怪獸冬甩
我最鍾意呢個 look，既得意又搞笑！冬甩入面都係綠茶味嚟㗎，仲有少許紅豆餡，外層以橙色朱古力包住，有少許紅豆蓉，食落好香甜！
檸檬怪獸冬甩
冬甩加入少許呍呢嗱油製成，配檸檬朱古力及車厘子果肉醬，酸酸嘅味道好清新、好醒胃！
小紅莓怪獸冬甩
叫得做小紅莓，當然內餡、醬料都係用番小紅莓啦，啱晒同樣都係「迷人 pink lady」嘅女生們！
曲奇怪獸冬甩
呢款有種「眼超超」嘅曲奇冬甩，用咗 72% 朱古力製成，咬落去有淡淡黑朱古力嘅「甘苦」味，上面還有少許曲奇碎！聽講呢款喺 Sweet Monster 內部非正式票選，堪稱係最好味嘅口味，絕對值得一試！
【相關報道】 快閃 jetso！怪獸爆谷雪糕買一送一
椰子怪獸冬甩
內有菠蘿餡，簡單配搭，食落寧舍清新！
唔只變色！今期飲品玩變色奶泡！
同期新出嘅冬季飲品系列，包括 綠茶奶泡、杏仁奶泡、紫薯奶泡及 椰子蝶豆花奶泡 4 款口味，均設凍熱飲！如果你 order 熱飲，就會感受到飲品有「上冷下熱」嘅效果！點解會咁？店子故意將凍冰冰嘅奶泡放喺暖笠笠嘅飲品上面，除咗等你感受到冷熱交融嘅感覺外，奶味會更濃更滑更香，一定要試下！每杯 $29/12oz、$33/16oz，凍熱同價㗎！
綠茶奶泡（凍）
如果你 order 熱飲，店子會送你 Sweet Monster 曲奇餅 1 塊；凍飲就會喺飲品上面加上不同口味嘅爆谷！綠茶顏色偏淺，味道亦偏淡，跟送朱古力爆谷！
紫薯奶泡（凍）
顏色好靚好 eye-catching，不過要注意下時間，時間一耐奶泡就會下沉㗎喇！紫薯味都幾濃郁，味道幾 natural，跟送焦糖爆谷！
【紫薯狂熱】 打邊爐必備 彈牙南瓜紫薯烏冬
椰子蝶豆花奶泡 （凍）
近期漸變色嘅蝶豆花都幾受歡迎，雖然無乜味，但淺藍色好有治癒感，睇到都開心！飲落椰子味重，配焦糖爆谷。
杏仁奶泡 （凍）
以為一杯白色嘢飲無乜特別？Sweet Monster 就特別配士多啤梨味爆谷畀你！杏仁味都幾濃，有少少似杏仁霜，不過就多咗少少香滑奶泡！
（前） 韓式檸檬特飲、（後） 韓式養生薑蜜 各 $24/12oz、$28/16oz
2 款飲品除咗有視覺效果外，都幾滋補㗎！韓式檸檬特飲特別採用韓國運嚟嘅鮮檸檬果肉，夠 fresh；韓式養生薑蜜用黑糖薑母沖調而成，驅寒一流！
飲品好足料，薑、檸檬都沉晒底，證明用真‧材料製成㗎！
Sweet Monster
地址：尖沙咀廣東道 30 號新港中心 1 樓 115-116 號舖
電話：2174 6750
營業時間：11am-9pm
註：怪獸冬甩系列、冬季飲品系列均於 12 月 1 日起發售；冬季飲品系列冷、熱同價
文：Joyce、攝：Keeyau、相關機構
【今期焦點】 世界首個出前一丁工作坊 DIY 專屬丁麵
【火鍋精選】 米綫店滋補 2 人雞煲
【掃街熱點】 葵廣情報 update！5 大必去新登場食店
歡迎你 like 我哋 U Food Facebook Page / U Food Instagram ，取得我哋更新更快嘅資訊！
