本地 3 點 3 美食代表，點可以無菠蘿包份？作為鐵粉，齋食菠蘿包，或者菠蘿油，已經滿足唔到我，需要落區尋找新刺激。
要雙手捧起的菠蘿包 burger，幾震撼！
美孚「 Haru & P Deli 美食堂」就勁嘞，供應巨型菠蘿包，個個半磅重，相當墜手！但最厲害之處，係有 15 款口味，包括港式、西式、日式，又鹹又甜，當正餐、做甜品都得。
用尺度一度，包面直徑有成 13 厘米。
蜜糖芥末豬扒 $38
鎚鬆過的豬扒較腍滑，煎香後配以蜜糖芥末，甜辣滋味，中和豬扒膩感。
鮮牛油 $33
不得了，一客有 6 片鮮牛油！喜歡吃菠蘿油要挑戰吓，唔食唔知身體好。
火腿炒蛋 $33
火腿絲炒蛋，滿滿的鋪在包面，一咬蛋汁豐富。
【相關報導】 真‧菠蘿 + 8.0 牛乳雪糕 邪惡菠蘿包三文治
幕後班底好搞鬼，老闆 Fiona 及大廚原本在葵涌廣場賣塔形窩夫、紫薯菠蘿牛角包及三色法包，好前衛！月前搬來美孚，地方大過以前舖仔，兼有位坐，可盡情發揮創意小宇宙。
芝士肉醬流心蛋 $38
肉醬用免治牛肉、番茄、甘筍、洋葱及香草等，煮足 2 小時而成，滋味濃郁，配搭荷包蛋及 Mozzarella cheese，烘香後更滋味。
墨魚汁蟹肉沙律 $38
淨蟹肉跟蛋及沙律醬做沙律，拌墨魚汁鹹香味突出。
朱古力忌廉 $33
看餡料以為是忌廉蛋糕，其實是自家用朱古力及朱古力粉做忌廉，還唧上朱古力醬，味道 double up。
既然以前出品的牛角包、法包都不甘平凡，試問菠蘿包又點會失色？Fiona 想做有餡款式，卻發現一般菠蘿包不夠大，於是尋找麵包店訂造特大菠蘿包，試過不同 size，最後敲定半磅重，包面直徑有成 13 厘米，size 是一般菠蘿包的 2 倍或以上，要雙手捧起先食到，單睇樣已震懾全場。巨型菠蘿包不論質感及味道，都跟平常的無異，有柯打時會先烘焗，入口暖笠笠。
紫薯菠蘿 $33
自家製紫薯蓉，烚好紫薯後打成蓉，伴以 2 塊略煎過的菠蘿片，菠蘿包終於有菠蘿啦！
日式照燒雞扒 $38
厚厚的雞髀扒先醃後煎，塗上日式照燒汁、自製 wasabi mayo，撒點木魚絲、紫菜，口感豐富。
明太子沙律 $36
和式風味，蛋碎、明太子、香草及黑椒混合而成，喜歡明太子的粒粒質感，微辣刺激。
配呢個巨包的餡料亦大玩花臣，由最初的焦糖鮮牛油、紫薯菠蘿及鹹牛肉炒蛋，演變成墨魚汁蟹肉沙律、明太子沙律、芝士肉醬流心蛋、蜜糖芥末豬扒等，連同最新力作抹茶紅豆雪糕竟然有 15 款，日日食，都要試足兩星期。
抹茶紅豆雪糕 $48
最新出品，吸睛位是成吋厚、正方形的呍呢嗱雪糕，連同抹茶忌廉及紅豆，港式 x 日式滋味，滿足。
芒果忌廉芒果粒 $33
自家打的鮮忌廉，滑溜溜，跟酸甜的鮮芒果粒，味道好夾。
鹹牛肉炒蛋 $33
鹹牛肉配炒蛋，夾埋菠蘿包食剛剛好。
Haru & P Deli 美食堂
地址：美孚荔灣道 16 號萬事達廣場N51號舖‧電話：3702 0230
營業時間：7am-11pm‧
收費：只限現金，不設加一
交通：港鐵美孚站 C1 出口
泊車：美孚新邨七期 $22/hr
平均消費：$50
備註：菠蘿包每日由 12nn 開始供應
文：Pam 攝：Nova
（原文摘自 U Magazine ISSUE 573）
【葵廣情報】 葵廣發現！台式現燙魷魚
【美味激鬥】 食編心水 爆汁小籠包 4 大推介
【名牌新品】 率先開盒！Lady M 貴氣雲石茶具
歡迎你 like 我哋 U Food Facebook Page / U Food Instagram ，取得我哋更新更快嘅資訊！
