雪糕店都有熱食唔係好出奇嘅，阿波羅一直都有賣 燒賣、 魚蛋、 撈麵，不過最近趁天氣開始涼涼哋，推出全新嘅迷你韓國部隊鍋。Poster 寫晒韓文，唔知味道又夠唔夠韓呢？
【相關報道】 邪惡厚多士 燒焦棉花糖包住雪糕
迷你部隊鍋 $28（加 $4 配芬達橙汁或提子汁）
所謂部隊鍋，原來唔係用鍋載嘅！可能係小食店關係，部隊鍋用紙碗載，方便捧住食。用辛辣麵，麵底即叫即煮。煮好麵條後，再倒入已放有辛辣麵調味粉嘅碗內加湯拌勻，再放午餐肉、泡菜、茄汁豆及芝士，細細碗嘅部隊鍋都幾多料喎！
迷你部隊鍋嘅精髓之一，梗係 午餐肉啦！不過呢碗部隊鍋嘅午餐肉，有一塊係碎上。加上午餐肉無煎香過，吸引力大減！
【大熱韓食】 韓迷揮手區 韓牛 + 龍蝦打邊爐
有兩片 車打芝士，放喺麵上受熱都有半融效果！好邪惡呀！
部隊鍋上面有 5、6 片 泡菜，酸度剛好又唔太辣，質地爽脆。
茄汁豆嘅分量就比較少，又無乜茄汁，拌勻都唔可以豐富部隊鍋湯底味道。提提想食嘅朋友，迷你部隊鍋唔係所有分店都有得賣，只有設熱食檔嘅分店先有㗎！
阿波羅 Appolo
地址：尚德商場地下 4 號舖
電話：2494 8881
營業時間：11am-9:30pm
註：部隊鍋於寶琳、華富、天澤、啟田、尚德、安定、沙角、禾輋等分店有售。
文、攝：Jessie
【放題精選】 顏值最高！好抵任食雞煲火鍋
