一碗好食嘅海鮮丼應該要……
刺身款式：今次揀咗雜錦海鮮丼飯做 battle。叫得做雜錦，刺身款式梗係愈多愈好啦，如果款式係時令再加分。
新鮮度：刺身款式多係唔夠嘅，唔新鮮有怪味，你畀原條吞拿魚都無用！
米飯：唔係要大大碗飯咁表面！飯要有米香甜味，質地黏糯有彈性，唔會太鬆散又唔會濕到一嚿嚿。
旺角刺身山 爆丼屋 10分
爆丼屋位於旺角最旺嘅地段，lunch time、晚飯、宵夜等食嘅人多到爆！主打日本東京現時好流行嘅爆丼，只見材料不見飯嘅海鮮丼真係好吸引！餐廳所用嘅海鮮有 7 成嚟自日本，每日約 12:30nn-1pm 返貨。早啲食，刺身都新鮮啲！
四重火山盛丼 $298
四重火山盛丼是店內用料最豐富嘅海鮮丼，中間嘅刺身蓉混入了拖羅、甜蝦、劍魚腩、帆立貝等，堆到成座小山丘咁，好豐富！計堆旁邊嘅三文魚子、加拿大海膽及松葉蟹肉，總共有 11 款刺身，好大堆頭！
拖羅蓉內混入了甜蝦、劍魚腩、帆立貝、赤身、紋甲魷魚、三文魚子及柚子皮。拖羅富油脂香，入口即融。甜蝦、紋甲魷魚、三文魚子又能增加爽彈口感。
三文魚子脹卜卜，鹹香爆脆。
加拿大海膽分量都唔少，一碗至少有 4 片！海膽厚身、無異味，仲跟兩包紫菜畀你包住食。
松葉蟹肉質地實淨，有海水鹹香，但蟹味較淡。
海鮮丼嘅醋飯用咗北海道七星米，飯粒飽滿、酸度剛好，但飯香一般。
| 小評 刺身款式：★★★ 新鮮度：★★★★ 米飯：★★★ |
爆丼屋
地址：旺角豉油街 50 號地下 8 號舖
電話：2332 2918
營業時間：12nn-2am
【相關報導】旺角驚現 700 克牛肉丼
鮪魚達人 豊洲水產 10 分
港島區嘅海鮮丼店愈開愈多，灣仔嘅豊洲水產一開幕即引嚟長長人龍。丼飯店係東京築地市場批發商開設，香港店是豊洲水産首間料理店，客人可以坐底慢慢歎海鮮丼，日本都無㗎！餐廳所用嘅海產除咗係築地直送之外，更有著名漁港三崎港的鮪魚（MAGURO）。MAGURO 於捕捉後會以攝氏零下 60 度急速冷凍，可以更有效保存魚鮮味。
豊洲海鮮丼 $358/2人份
店內最吸睛嘅二人前豊洲海鮮丼，鋪滿牡丹蝦、甜蝦、帆立貝、鮪魚赤身及鮪魚腹身、香葱鮪魚腩蓉、油甘魚、醋鯖魚、海膽、山芋粒、鮮海草、三文魚子、皇帝蟹肉等 12 款材料，全店最豐富！
腹身肉質肥美，入口即融，食完滿口油脂香，唯一要彈嘅係太細塊，唔夠喉！
近骨的魚肉製成魚蓉，魚味濃郁，質感軟綿滑溜。
牡丹蝦鮮甜度一般，蝦肉亦唔算爽彈。
試食當日無晒海膽，廚師畀多啲三文魚子補數。三文魚子比較細粒又唔夠晶瑩，咬開唔夠 juicy，味道唔夠鹹鮮。
選用日本山形縣生拔米，飽滿有光澤，飯粒黏度適中。酸度適中，可以引出刺身甜味。
| 小評 刺身款式：★★★★ 新鮮度：★★★ 米飯：★★★ |
豊洲水産海鮮丼専門店
地址：灣仔謝斐道 415-421 號積福大廈地舖 B
電話：2808 0292
營業時間：12nn-3pm、6pm-11:30pm
【相關報導】築地豊洲水產着陸！超多款海鮮丼 聽日有得食
加大碼刺身 豊勝手丼 12 分
海鮮丼專門店都可以好好玩！於銅鑼灣開業兩個月嘅「豊勝手丼」，大玩車仔麵形式，自己刺身自己揀，包你食到最愛組合。呢隻點餐方法源自北海道嘅釧路和商市場，當地客人可於市場內點個白飯，再自由選擇喜愛刺身，呢種海鮮丼又叫做「勝手丼」。店內嘅海刺大部分由日本空運到港，厚切三文魚、三文魚腩、韓國紫海膽、帶子、牡丹蝦、松葉蟹肉等 22 款選擇，每款價錢 $18-$148 不等。自己揸唔定主意諗食乜，揀個乜都有五品丼啦！
五品丼 $248
呢個五品丼有廚師精選 5 款時令刺身，帶子、三文魚、油甘魚、赤蝦、加拿大海膽各兩片，全部都係 XL size！
赤蝦差唔多有筷子咁長，蝦肉又甜又爽。
加拿大海膽超厚身，跟湯匙一樣咁大塊，味道甜而不腥。
話刺身係加大碼一啲都無講錯，刺身足足有 1.5cm 厚。油甘魚嫩滑、油份充足，味道甘香。
選用日本米，飯粒唔算好飽滿，飯味唔突出而且偏酸。但醋米混入了芝麻及醃漬沙甸魚乾，增添鹹香。
| 小評 刺身款式：★★★★ 新鮮度：★★★★★ 米飯：★★★ |
豊勝手丼
地址：銅鑼灣謝斐道 468 號百達中心地下 D 舖
電話：5546 5046
營業時間：12nn-11pm
【相關報導】自己刺身自己揀「車仔麵」style 海鮮丼
人氣熱店 築地‧山貴水產 8 分
曾經叫人等到心如鹿撞嘅灣仔築地‧山貴水產，到今日未夠 12 點開門就有 30 幾人排隊等食。水產市場每日由築地本店直送新鮮來港，除星期日之外，每日約 4pm 送到，夜晚嚟最有機會食到當日即劏刺身。海鮮丼區內有 10 款海鮮丼，食到最豪試到最盡必揀特產山貴丼！提提大家，水產市場於 11 月 14 日會休息一日！
特產山貴丼 $238
原隻蟹鉗、龍蝦肉、三文魚籽及 10 款角切魚生。海鮮丼可以直接食、用紫菜包刺身及飯製成手卷以及加高湯即成茶漬飯。不過試食當日，職員無主動畀高湯！
10 款角切魚生有啲乜？通常都是用咗當日嘅新鮮刺身，好似大拖羅、吞拿魚赤身、三文魚、油甘魚、三文魚子等，不過負責海鮮丼嘅廚師都答唔出用咗咩料，食到咩靚魚就要睇彩數喇！
用阿拉斯加龍蝦，龍蝦肉無調味，肉質唔夠實淨。松葉蟹鉗睇落好飽滿厚肉，但蟹味欠奉。
試食當日食到日本海膽，不過「幸運」嘅朋友會食到加拿大海膽！不過店員放海膽時好粗魯，將海膽篤到爛晒，片片都唔太完整！
提供埋紫菜畀你包刺身當手卷食，可惜紫菜係腍嘅……
醋飯選用新潟米，飯粒圓潤飽滿，黏性重，但無乜飯味同醋味。
| 小評 刺身款式：★★★★ 新鮮度：★★ 米飯：★★ |
築地．山貴水產市場
地址：灣仔碼頭二樓
查詢：http://yamataka.hk/
營業時間：12nn-8pm
【相關報導】率先直擊！灣仔築地必掃 Check Points
總評：豊勝手丼 勝！
都話㗎啦！食刺身，分量多係重要，不過最最最重要都係質量。今次 battle 完全體現得到！10 幾款海鮮刺身，大堆頭唔一定做得好。豊勝手丼的五品丼雖然得 5 款刺身，但每款都做到好、夠新鮮。三文魚唔會鬆泡泡、油甘魚有魚香。赤蝦爽甜又巨型，海膽雖然是加拿大貨，但味道甘甜。醋飯更伴入魚乾提味，酸甜中帶點鹹，唔使加豉油食都好夠味！何況舖頭採「車仔麵」形式，想食幾多款刺身，自己揀囉！
文：Jessie；攝：nova 、Brian、Kee
【相關報導】
有伏有讚！松坂庫手卷邊款得？
外面脆 內 creamy 泡芙邊款最好食？
便利店茄醬意粉 邊款最好食？
歡迎你 like 我哋 U Food Facebook Page / U Food Instagram ，取得我哋更新更快嘅資訊！
