「硬蛋香港體驗館」最近引入咗全港首部 3D 食物打印機，以往睇 Youtube，都睇過外國有好多打印食物既 video，今次終於可以親身喺數碼港見識新技術。由台灣 XYZprinting 研發、設計及製造嘅 3D 食物打印機，size 大約係普通微波爐嘅兩倍，黑色外型令立立，曾經喺 2015 年嬴得歐洲 IFA 消費電子展創新設計大獎，巧威威。
由台灣 XYZprinting 研發、設計及製造嘅 3D 食物打印機，預計價錢為 2 至 3 萬港元左右。
機身本設定一些得意圖案，如熊仔、盾牌、香橙等等。
究竟部機點運作呢？暫時可打印曲奇餅，遲啲仲可以製作 pizza、pancake 等。先將曲奇材料 mix 好，再擠入特製食料管中，將食料管放入機器內並揀好食譜程式，部機就會自動打印曲奇餅。圖案做得細緻，例如揀自選英文字圖案，就用 1mm 咀噴出曲奇材料，讓綫條更幼細，大約需時 20-30 分鐘就打印好，再放入焗爐烘焙就完成！
暫時可整原味或朱古力味曲奇，材料有可可粉、麵粉、牛油、蛋等。
材料攪拌後，再擠入特製食料管內。
特製食料管裝有原味曲奇及朱古力味曲奇材料。
將食料管放入打印機，再啟動程式就開始打印。
機身底部可打開膠門觀察打印情況，如印小熊曲奇就需 20 分鐘左右。
想試 3D 打印曲奇味道嘅朋友，有好消息！因為可以免，費，試！方法有兩個，最簡單係去場館參觀，同時下載「ingdan 硬蛋」手機 app 及到 facebook 專頁按 like，即可免費食指定款式曲奇，有熊仔和美國隊長盾牌圖案，仲有免費咖啡或果汁飲！好筍呀！
曲奇會逐層逐層打印，打到第三層左右已見成形。
U Magazine 圖案曲奇
小熊、美國隊長盾牌曲奇打印完成！
如果想要特別圖案或字體曲奇，可預早一星期時間，將心水圖案或字體化成 .stl 檔 send 到 enquiry.hk@cogobuy.com，如硬蛋方面確認圖案可行，就會聯絡你安排打印，都係免費㗎！
硬蛋館窗口位一閣劃出 cafe area，仲可以欣賞無敵大海景，心曠神怡。
硬蛋香港體驗館
地址：香港數碼港道 100 號 3 座 F 區 8 樓 811-813 室
開放時間：星期一至五 10am-5pm
電話：2866 0020
文：Celia、攝：Lok
歡迎你 like 我哋 U Food Facebook Page / U Food Instagram ，取得我哋更新更快嘅資訊！
