呢間叫「籠町茶番」嘅小食店喺荃灣，格局似足台飲店，門口仲掛咗幾個紙燈籠，真係有啲寶島 feel。舖頭門面貼咗好多關於台灣炭烤麻糬的報章報道，餐牌上更寫着「正宗台灣手工」、「西門町創始店」、「松廣碳烤麻糬」、「100% 空運抵港」等字眼，唔通係直營店？店員表示不知情，老闆又不在。
麻糬一共有 16 款口味，當中 芝士、 花生、 煉乳、 雙重抹茶、 芝 麻抹茶及 黑糖抹茶為店子推介！
無辦法啦！惟有食咗先！烤麻糬有 16 款口味，包括 原味、 芝士、 黑糖、 花生、 朱古力、 煉乳、 抹茶等，而每款口味都可同抹茶配搭，仲有雙重抹茶㖭！記者柯打咗雙重抹茶、芝麻和芝士口味麻糬。收到柯打後，店員將麻糬以竹籤串起，再放入烘烤機上慢烤；麻糬烤至軟身，再淋上相應口味嘅醬汁，食得！
芝麻麻糬 $11
芝麻醬本來好甜，配淡淡的麻糬一齊食，甜度反而啱啱好。芝麻 X 麻糬係零違和感嘅組合，好夾！
芝士麻糬 $12
個人最愛！麻糬煙韌得嚟帶微微焦脆，芝士味慢慢滲出嚟，再連埋少許甜奶油，超讚！
雙重抹茶麻糬 $13
店中有多款抹茶麻糬。「抹茶」是指原味麻糬加抹茶醬烤；「抹茶麻糬」是指本身帶抹茶味的麻糬；而這款「雙重抹茶麻糬」就是抹茶味麻糬加抹茶醬烤香。雖然係「雙重」，但食落麻糬唔夠煙韌，仲帶硬㖭！沒有抹茶應有的甘甜味，反而帶酸，有伏味。
皇牌必飲：熊貓抹奶茶
熊貓抹奶茶 $22 (冷熱同價)
即係黑白珍珠抹茶奶茶，以抹茶粉再混合奶茶和珍珠調成，有少許茶澀味，不過質感尚算幼滑，黑白珍珠口感 QQ！惟略嫌過甜，建議買五分甜就可以！
黑白珍珠味道分別不大，口感煙韌。
籠町茶番
地址：荃灣青山公路荃灣段 219 號富華中心 1 樓 3C 號舖
電話：3480 7186
營業時間：12:30pm-10:45pm
文、攝：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
