旺中無敵台飲 芋圓 x 珍珠奶茶

星期六下晝時段，勁多妹豬排隊等食！不過今次吸引我嘅，係 4 款芋圓飲品，集結咗芋圓及台式奶茶，兩大我至喜愛的台灣美食於一身！

（左起）芋圓珍珠奶茶、芋圓布甸奶茶、芋圓紅豆水、芋圓紅豆奶茶 各 $16/ 杯

飲品真身與 poster 有出入， 芋圓、 珍珠、 布甸沉晒底，圖片只供參考，你懂的！店員收到柯打後隨即於雪櫃拎出預先沖好嘅奶茶。奶茶顏色偏淺，由於唔係即叫即沖，對奶茶味道無乜期望！但飲落有茶香，無乜奶精或奶粉味，茶味清香唔太甜，亦唔澀。

珍珠比較細粒，而且黏成一堆。口感硬身，沒有黑糖味。

雖然芋圓沉晒底，但芋圓分量都唔少，仲有紫薯圓及地瓜圓，黐埋至少 10 粒！深紫色的紫薯圓真係有紫薯香味，口感煙韌。

淺紫色的芋圓味道比較淡，芋頭味唔明顯，質感比紫薯圓腍啲。

橙黃色嘅番薯圓好硬，硬到小記懷疑店員未煮透！而且唔煙韌，不過食落確係有番薯味。

紅豆配奶茶，味道有啲甜。

芋圓布甸奶茶無珍珠或紅豆調味，甜度明顯較低，不過布甸嘅甜味又正好彌補番茶嘅甜度！以為布甸一定係滑嘟嘟，點知佢係爽口嘅！

唔飲奶茶，仲有紅豆水選擇。紅豆水至少半杯都係紅豆，好足料！啲豆煲到腍晒又有啲起沙，飲落都幾似飲紅豆沙，加上味道唔太甜，幾好飲！

呢幾杯芋圓飲品味道確係唔錯，有咩要彈呢？就係芋圓大過枝飲管，啜奶茶嘅同時芋圓好易頂實枝飲管，想食芋圓一定要用匙羹食，一邊行一邊飲就唔太方便喇！

YO+ Snack Shop

地址：旺角彌敦道 688 號旺角中心一期 3 樓 301

電話：從缺

營業時間：12nn-10pm

文、攝：Jessie

【相關報導】
旺中 vs 葵廣 4 大海膽手卷 邊間最正？
旺中變新葵廣？帶你掃齊最新小食店

歡迎你 like 我哋 U Food Facebook Page / U Food Instagram ，取得我哋更新更快嘅資訊！