韓國餐廳 The Joomak 的韓菜一向走創意路綫，最近除咗彩色炸雞外，更推出 2 款「韓鍋」，有傳統感覺之餘，亦加入點點西式元素。好似大蜆泡菜羅宋湯，一聽個名就知唔係悶蛋泡菜鍋，以羅宋湯作湯底，加入泡菜和大蜆，一邊㷫住，一邊聞到酸香味！湯頭既有泡菜酸辣，亦有羅宋湯香甜，當然不少得點點沙白蜆的鮮味。而韓國名物人蔘雞湯，則變成法春雞人蔘湯底，用法國原隻春雞炮製，雞肉比一般嫩滑；湯底以 5 隻新鮮走地雞熬成，再加入人蔘、紅棗、杞子、淮山等材料燉 5 個鐘，雞味濃甜之餘，更盡吸各種材料精華，啱晒我哋秋冬飲。
大蜆泡菜羅宋湯底 ＄158
估唔到泡菜同羅宋湯的味道會咁夾！泡菜的酸辣加上羅宋湯的酸甜，好醒胃。湯底仲有大沙白蜆、豆腐及芽菜，令湯頭更加鮮甜。
法國春雞人蔘湯底 $238
差點被賣相嚇親！原隻春雞上有整條人蔘，似模似樣！加埋紅棗、杞子、准山、辣薑及蒜粒熬足5 小時，未飲已經閒到香味。湯頭好甜兼有陣陣蔘香味，飲一啖都覺得夠晒補。
【相關連結】
逐款試！韓國彩色炸雞
韓國底本身已有好多配料食，更可用嚟打邊爐。店中有 2 款鍋物拼盤，材料以新鮮和健康為大前提，少用醃製配料。海鮮迷必試龍蝦豐盛拼盤，原隻波士頓龍蝦，上枱時仲非常生猛，仲識郁！汆熟後鮮爽彈牙；來自美國的黑豚豬腩片及肥牛，質素穩定有保證。
龍蝦豐盛拼盤 $498（2 人用）
原隻生猛波士頓龍蝦，夠晒霸氣！上枱時仲郁緊！其他配料還有美國特級肥牛及黑豚豬腩片，牛肉味夠重，黑豚豬腩片很爽口。沙白大蜆夠新鮮，放湯煮一陣，仲散發出淡淡鮮甜。拼盤仲包自家製泡菜墨魚及鯪魚滑，質感彈牙。至於蔬菜，有南瓜及紫薯片，仲有大熱 superfood 羽衣甘藍，食落似芥蘭，好爽口，而且熱量勁低，每 100 克只得 30 卡，符合健康原則。水晶冰菜於香港亦甚少見到，微微帶酸，好特別。
如果你係牛魔王，必食韓牛拼盤，主打來自韓國 1++ 的牛前腿（每隻牛只有百幾克，相當矜貴），牛味比一盤般美國牛重，而且入口嫩滑，食唔停口！除咗拼盤，仲有好多散點配料可追加，邊個話食韓鍋唔可以過邊爐癮？！
韓牛拼盤 $498（2 人用）
向牛魔王誠意推介，選用來自韓國 1++ 頂級牛前腿肉，牛味比一盤般美國牛更濃，而且入口嫩滑無渣。其他配料與龍蝦豐盛拼盤差不多，分別在於少了美國豬及牛肉，多了 size 好似盛開菊花咁大的雪耳，爽口好吸湯。
附設點餐紙，想追加邊款鍋物配料都得。
The Joomak
地址：尖沙咀廣東道 17 號海港城海運大廈 3 樓 LCX 34 號舖
電話：2111 0851
營業時間：11:30am - 10:30pm
文：Theo 攝：Ken
【相關連結】
今晚去快餐店打邊爐！邊間好？
歡迎你 like 我哋 U Food Facebook Page / U Food Instagram ，取得我哋更新更快嘅資訊！
