「点心代表」一向鍾意將點心變 cute 啲，繼蛋黃哥、醜比頭之後，由即日起至 2017 年 1 月 17 日，會有一系列蠟筆小新點心登場，當中包括 10 款食物和 4 款飲品。
點心店環境裝修貫徹主題，鋪天蓋地都有蠟筆小新蹤影。
Menu 好鬼過癮！搞到好似本漫畫咁精美！原來仲分成「搗蛋篇」嘅點心系列及「被打篇」嘅甜品及特飲，笑死我喇！
不理不理左衛門奶黃流沙包 $49/2 隻
兩隻眉粗粗嘅豬仔不理不理左衛門，好可愛！內餡以鹹蛋黃混合好立克粉、煉奶加鮮牛油製作，香香甜甜，比一般流沙包餡有層次。
用筷子拮穿鼻窿，豬仔仲會流鼻水，最啱放上網呃 like！
小新 & friends 牛奶流沙包 $49/3 隻
小新拉埋朋友仔妮妮、亞呆變做牛奶流沙包，個餡用咗日本 3.6 牛奶、蛋白及新西蘭奶粉製成，奶香十足仲好流㗎！
大象朱古力流沙包 $49/2 隻
嘩！小新無着褲呀，露出小象仔！呢個流沙包以瑞士原粒朱古力混入烘焙過嘅鹹蛋黃，朱古力味好香。
喺小新 pat pat 拮個窿仔，哎呀！小新你……好醜怪呀！
三兄弟鮮蝦餃 $49/3 隻
鮮蝦餃用咗越南原隻大蝦、手打豬肉做餡，仲加入秘製豬油製成，食落好甘香。除咗中間嘅小新之外，唔係好認得其他兩位朋友仔？介紹番，左邊係亞呆、右旁係正男，認得嘛？食咗佢啦！
蒙蒙豬蝦餃海鮮腸粉 $49
唔好見到咁可愛嘅小新尖叫，會噪醒佢㗎！小新頭其實係一粒蝦餃，張被就是腸粉，入面有越南原隻大蝦、帶子、蟹柳做餡，睇得又食得！
小新 & 小白松子百合餃 $49/3 隻
餡料係松子、鮮百合及大蝦，不過最吸引都係百合餃面嘅小新及小白萌樣！
（後）真真假假西瓜糕 $35/3 隻
（前）情人蛋撻 $35/2 隻
「被打篇」嘅甜品有呢個超像真嘅西瓜糕，用咗西瓜肉及日本魚膠片製成，中間嘅核係蘭香子，咬落脆卜卜咁！小新都有柔情嘅一面，呢隻情人蛋撻上面有埋妮妮個靚樣。曲奇撻皮，內餡是北海道 3.6 牛乳混入日本蛋白製成，外皮脆脆、內餡滑嘟嘟。
震震屁股奶凍 $39
用日本 3.6 牛乳、淡奶油混合日本魚膠片製成牛奶凍，小新嘅 pat pat 則是桃味奶凍，震騰騰。
小新椰皇燉奶 $59
呢個燉奶有超香椰香味，日本蛋白加椰子水及北海道牛乳製成，食完想大嗌，好椰呀！
（前）小新桃味特飲 $39、（後）小白朱古力特飲 $39
小新桃味特飲用鮮橙汁、雪碧、紅莓及蘇打水 mix 成，上面仲有震震屁股奶凍！小白朱古力以朱古力粉、朱古力雪糕、鮮忌廉、碎瑞士朱古力、棉花糖及日本 3.6 牛乳製成，朱古力迷必試！
（左）媽媽櫻花味啤酒 $69
（右）爸爸啤酒 $69
飲品營造媽媽飲醉面紅紅嘅感覺，100% 日本進口麒麟沙冰啤酒，又厚又高嘅泡沫都係啤酒造嘅，好幼滑！
点心代表
地址：中環德己立街 1-13 號世紀廣場 B/F、尖沙咀 The One 3 樓 L308 號店
電話：2807 1682（中環）、2885 1345（尖沙咀）
營業時間：11am-11pm
「点心代表 x 蠟筆小新」供應時段：即日起至 1 月 17 日
文：Jessie、攝：may
歡迎你 like 我哋 U Food Facebook Page / U Food Instagram ，取得我哋更新更快嘅資訊！
