繼早前嘅大大份「巨型咖喱飯」，Tiger Curry 再舉辦新挑戰─—只要於 8 分鐘內食晒整個激‧辣咖喱飯，即可免費。
究竟有幾辣？呢個激‧辣咖喱飯名為火舞者咖喱飯，裏面有曾被辣椒界嘅米芝蓮「史高維爾」指標評選為 2015 年世界最辣嘅辣椒第一位──千里達蠍子辣椒汁，辣度係 Tabasco 嘅 50 倍！可以想像有幾辣！
火舞者咖喱飯 $168
餐廳將千里達蠍子辣椒汁加入餐廳招牌嘅咖喱汁之中，有甚麼配料？有炒滑蛋、烤肉腸、吉列豬扒彈（肉丸）、吉列豬扒及日式漢堡扒！大大份，就算唔計辣度，女生都好難食得晒，睇嚟都唔易挑戰㗎！（溫馨提示：辣椒只為裝飾之用，不在挑戰之內，放心放心！）
激‧辣大挑戰！
加咗千里達蠍子辣椒汁嘅咖喱汁，聞落多一分酸味，食落真係有強烈辛辣感，爆炸力驚人！辣度後勁亦很凌厲，食到第 4 啖之後就感覺到喉嚨、食道有種「火般灼熱」嘅感覺！
果然係 Tiger Curry 嘅皇牌 item，吉列豬扒炸粉漿很薄，以致口感很酥脆，豬肉味濃，軟腍之餘不失嚼感，讚！
吉列豬肉彈嘅口感與吉列豬扒一樣炸得很酥脆，但食落更 juicy！
滑蛋口感很讚，滑溜得嚟蛋味又重！
珍珠米食落煙煙韌韌，而且很吸咖喱汁，添加咗不少辣勁。
敗筆處在於漢堡扒，雖然牛味、豬味夠香夠濃郁，但口感略嫌過韌，有點嚡口。
最後挑戰結果：失敗！
失敗並不在於辣度，而係分量太多，很飽滯！切勿隨便挑戰，想估計下自己得唔得，可以平日食米綫作指標。
| 食米綫辣度參考！ 10 小辣：完全唔使諗，此挑機不屬於你！ 5 小辣：搏一搏，單車變摩托！ 中辣：機會嚟啦飛雲！Come On！ 大辣：純粹過下口癮，可不屑地挑機！ |
（辣度因人而異， 請自行判斷）
只要喺 8 分鐘內食晒整碟咖喱飯，就算挑戰成功，唔使拎銀包出嚟就可走人，仲送你 $150 餐飲券畀你下次再吃！同時由即日起至 11 月 7 日，以最快速度食晒整碟飯嘅挑戰者，仲可以得到 Tiger Curry 送出嘅單人大阪來回機票㖭！小編採訪當日見到，暫時成績最快嘅客人只需 5 分鐘 35 秒就搞掂！你有無信心？！
Tiger Curry
地址：銅鑼灣邊寧頓街 14 號地下
電話：2511 1051
營業時間：12nn-11pm (10:30pm last order)
文、攝：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
