銅鑼灣樓上甜品店 ZUC.CCH.ERO，店內設有開放式吧枱，客人可以近距離睇到甜品師製作甜品的過程。白色磚牆再加埋好似試管嘅玻璃樽，似足實驗室。其實甜品店亦是老闆 Karen 及一班甜品師的實驗場所，他們不停研究玩得、睇得又食得的好味甜品。
Planet Earth $128
Tea Set 有嚿棉花糖雲同 mini size 地球，地球外層是茉莉花茶慕絲，茶味淡淡地，但食完整個北半球之後，整個口腔都是茉莉茶的幽香。中間是流心血橙汁，橙味的酸甜跟茶味好夾。
原來甜品背後都可以帶出環保概念！呢個甜品上枱，仲跟埋蜜瓜味及竹炭味糖水，噴在地球上面的棉花糖上，綠色的蜜瓜味代表綠化、黑色竹炭味代表污染。
噴咗竹炭味糖水，見住黑色的糖水滴到地球上面，造成污染。食甜品的同時又可以反思吓環保問題，呢度嘅甜品真係唔止得個樣。
Tea Party Set $338/ 2 位起
原來甜品店不經不覺開業一周年，Karen 也特別推出姊妹們最愛嘅 2 人 Tea Set。Tea Set 用咗藍色做主題，5 款鹹食及 5 款甜點放於六角形雲石板上，呢個絕對是為相機而設的擺盤。
女孩子最關注的是有咩甜品好食，Karen 首推呢枝棒棒糖，白朱古力的外層包住花生醬慕絲，呢個配搭可謂極邪惡。但當咬開脆脆的朱古力外層，隨即食到質地滑到好似流心狀的花生醬慕絲，濃郁的花生醬味滑到喉頭，加埋粒粒花生碎的口感，減肥？食埋再算啦！
這個藍白色波波，好似個迷你版地球仔！切開睇，中間仲有地核。嘩！食甜品好似上地理堂咁！原來地球的外層是白桃慕絲，內層的「地核」是白桃粒及紅桃汁，味道酸甜清新。
淡黃色的是芝士雞蛋蛋糕，上面插咗乾蘑菇及黑松露醬。入口先有雞蛋味，然後湧出黑松露醬的味道，食到最後又會滲出香草的青草味，略為沖走黑松露那陣霸道的味道。
有意粉食？咁易畀你估中又點會有驚喜！甜品師將新鮮芒果汁及熱情果，以分子料理的方法唧成好似意粉嘅造型，玩味十足。
一身藍色 look 嘅 macaron 是士多啤梨及白桃味，難得 macaron 做得唔太甜！鹹點仲有煙三文魚多士、竹炭蛋糕配鹹香嘅堤魚，仲有自家製鬆餅配新鮮 raspberry 製成的果醬。
Molten Earl Grey $68
早前推出過紫薯味流心芝士撻，今次換上「伯爵茶」新味。製作 5 個撻就要用上 12 個茶包，難怪伯爵茶味咁突出，旁邊有一球豆腐味雪糕及沖繩黑糖醬。
Snow White $118
新甜品系列，打頭陣有白雪公主的紅蘋果。甜品師用拉糖技術整成蘋果造型的外層，鮮紅色的紅蘋果真係好吸睛，甜品師拎出嚟，已經吸引好多客人目光。
食嘅時候要用匙羹打碎紅蘋果，蘋果入面仲有柚子味雪葩！旁邊伴有芝士蛋糕粒、肉桂蘋果 crumble。
ZUC.CCH.ERO
地址：銅鑼灣耀華街 3 號百樂中心 18 樓 1802-3 室
電話：3427 9828
營業時間：3pm-12mn，星期二休息
文：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
