今次推出紫薯 buffet 的是尖沙咀百樂酒店，聽講只係推出幾日，星期六、日的 tea buffet 已經就快 full booking，超旺場！雖然自助餐都有其他鹹甜美食，但還是以紫薯食物最快被客人搶,空，廚房要不斷 refill，紫薯魔力堅驚人！即刻教你 mark 實 4 大必食位！
checkpoint 1 瘋搶頭啖「紫薯」！
身為紫薯迷，點可能錯過紫薯甜品？有焗原隻紫薯、紫薯藜麥奶凍、紫薯藜麥木槺布甸、紫薯藍莓芝士餅、紫薯美式芝士餅、紫薯忌廉 mousse 蛋糕、紫薯酥皮盒等。
紫薯藜麥奶凍
紫薯美式芝士餅
紫薯酥皮盒
小編最愛紫薯藜麥木槺布甸，甜糯嘅紫薯配上口感滑溜嘅木槺布甸，絕配！另外，焗原隻紫薯亦唔錯，雖然感覺好似好飽滯，但見到真身之後又忍唔到口，原隻紫薯經烘焗後，紫薯香氣出晒來，每一啖既有紫薯粒的咬口，又有滑溜的紫薯蓉！
checkpoint 2 挑戰激紫薯鹹點
紫薯甜品就食得多，鹹食的確第一次見！Park Cafe 今次亦推出紫薯鹹食菜式，身為紫薯控，唔係無膽挑戰呀？繼上次推出綠茶雞翼，今次再嚟「紫薯藜麥燒雞翼」！在燒得惹味的雞翼面塗上以紫薯及車打芝士、巴馬臣芝士混合而成的醬汁，最後灑上帶點咬口的藜麥！芝士的鹹香減低了紫薯的甜度，食落與雞翼都幾夾，不過雞翼可以燒得再惹味啲，帶點微焦更好！
餐廳亦將紫薯打成薯蓉，與藜麥、麵包槺、蛋黃醬等炮製成薯餅，裏面再有紫薯蓉，外脆內軟得嚟，紫薯味亦濃郁！
其他紫薯鹹點仲有紫薯藜麥蟹肉沙律、紫薯藜麥三文魚炒飯、蒜香藜麥焗田螺、紫薯三文治等。
checkpoint 3 熱辣辣！即叫即製
餐廳亦設即叫即製 station，配合番紫薯 x 藜麥的主題，即叫即整紫薯藜麥梳乎厘、紫薯雞蛋仔、紫薯班戟及紫薯鮮奶撻！梳乎厘上有香脆燕麥碎、雞蛋仔脆卜卜又煙韌、班戟口感幾有層次、鮮奶撻鬆化又充滿奶香，係客人大排長龍嘅必食 items！除此，餐廳亦設飛碟機、班戟機及港式車仔麵 station！
紫薯藜麥梳乎厘
紫薯班戟
紫薯鮮奶撻
checkpoint 4 必掃凍海鮮
雖然係 tea buffet，放心，都有香港人好鍾意嘅海鮮食。不過，始終係 tea，海鮮選擇相對比較少，小編試食當日，只有青口、田螺、大蝦、三文魚刺身及鯖魚刺身，海鮮 quality 尚可接受！
嫌 buffet 太勁量，酒店亦推出紫薯下午茶 ($138 /位起)，小食包括意大利火腿紫薯多士、煙三文魚藜麥芒果卷、磯燒鮑魚藜麥酥盒、雪花蟹腳藜麥蕎麥麵、紫薯藜麥燒雞翼和英式鬆餅、紫薯美式芝士餅、紫薯忌廉慕絲蛋糕、紫薯藜麥奶凍、紫薯藜麥木糠布甸以及雜果紫薯吉士撻，啱晒女士來 high tea！
「紫薯 x 藜麥」下午茶自助餐
供應時間：即日起 2017 年 1 月 4 日 3pm-5pm
價錢：星期一至五 成人 $178/位、小童 $158/位；星期六、日及公眾假期 成人 $198/位、小童 $178/位，設加一
文、攝：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
