便利店茄醬意粉 邊款最好食？

行勻兩大便利店，找出以下 4 款叮叮茄醬意粉來比拼，其中兩款是本地薑「一叮芝士肉醬意粉」及「7-11 肉醬意粉」，日本品牌代表則有「日本製粉大盛拿破倫茄汁意粉」及泰國品牌代表「CP 辣肉腸配忌廉茄汁意粉」，以醬汁味道、意粉軟硬度、餸料、價錢進行比拼，睇吓邊款可以榮登便利店茄醬意粉王！

日本製粉 大盛拿破倫茄汁意粉 $30.9 (a)
叮完賣相好似唔多吸引，醬汁較少又乾身，而且料實在太少，只有兩條青椒及幾粒腸仔。好在個汁做得唔錯，食落茄味幾濃又食得到番茄的酸甜味，意粉軟硬度又幾適中，幾有咬口。不過以 $30.9 的價錢來說，性格比不是太高。

評分 醬汁：＊＊ 1/2 意粉：＊＊＊ 餸料：＊ 價錢︰＊ 總分：7.5

CP 辣肉腸配忌廉茄汁意粉 $20.9 (a)
第一眼以為自己買錯其他款式意料！醬汁不是一般茄汁意料的鮮紅色，而是橙黃色，睇落有幾分似喇沙汁。要讚醬汁與意粉分開放，不會令意粉浸到腍晒。茄汁味不算濃，冇乜茄汁味，意粉成餅狀，難以分開又有點過腍，餸料有 4 片司華力腸，算係有啲嘢咬。總體似食緊茄汁意粉。

評分 醬汁：＊＊ 意粉：＊ 1/2 餸料：＊＊ 價錢：＊＊＊1/2 總分：9

一叮 芝士肉醬茄汁意粉 $25.9 (b)
最似一般餐廳食到的芝士肉醬茄汁意粉，賣相好吸引，而且餸超多，仲有一大「pat」番茄肉醬、粟米粒，仲有焗芝士效果。食落有點失望，茄汁味不算濃，而且有點過甜，肉粒有點過硬，勝在意粉幾爽口，條條分明又粗身，而且分量十足，夠飽肚。

評分 醬汁：＊＊ 1/2 意粉：＊＊＊1/2 餸料：＊＊＊＊ 價錢：＊＊＊ 總分︰13

7-11 肉醬意粉 $16.9 (a)
同電影《志明與春嬌》的張志明一樣，對 7-11 嘅肉醬意粉有種情意結，由細食到大，好似一種集體回憶。雖然醬汁與餸料冇「一叮」咁多，但茄味好濃，仲好惹味 (同事表示好重味精！) ，意粉比較幼身，食落爽口彈牙，唔會一「pat pat」。不過餸料就只得肉醬，價錢仲係 4 個中最平！

評分 醬汁：＊＊＊1/2 意粉：＊＊＊＊ 餸料：＊＊＊ 價錢：＊＊＊＊ 總分︰14.5

(a)售賣點：7-11
(b)售賣點：Circle K

文︰Theo、攝︰Ray

歡迎你 like 我哋 U Food Facebook Page / U Food Instagram ，取得我哋更新更快嘅資訊！