利小館係利苑集團嘅年輕副綫，菜式賣相和碟頭除咗迎合年輕人口味，菜館仲不時搞新意思。剛剛 9 月底喺 YOHO MALL 新店率先試業，新裝修之餘仲大搞「全自動化」，引入「Lei Express 利速達」，餐廳內有 3 條自動輸送帶，自動將餸菜送到客人座位旁邊，勁有效率！
整間餐廳有 3 條「Lei Express 利速達」輸送帶，每枱客人都可享用自動化服務。
輸送帶 10 秒就將食物放到客人枱旁，望住佢傳菜幾有新鮮感。
現時仍處試業期間，記者率先去參觀新 system 點 work！每個卡座旁邊都有部 iPad mini，想點菜可用電子 menu 慢慢揀，感覺好 young。等候時間同平時一樣，視乎菜式烹調時間，不過一旦煮好，放上輸送帶 10 秒左右就送到枱邊，高速！客人要打開櫃門，伸手取菜，雖然無平日咁疏乎，但全自動化體驗充滿新鮮感，而且菜式送上枱比平日更熱辣辣。
ipad mini 點菜系統，點完後數分鐘就有餸菜送到。
食物送到卡位，屏幕會自動打開，拎完餐後就按紅色掣關門；如想叫侍應幫忙可按藍色掣。
餐廳經理指輸送帶分上、下兩層，上層就送不易倒瀉的食物，如點心、飯等等，而下層則送湯、飲品等，讓客人容易取菜。他指試業一個多星期，客人反應好，自動化又可幫輕員工工作量，win win 咁話！我作為客人都自覺良好，起碼在繁忙時段，侍應唔會愈叫愈走！咪以為自動化即係無 service，其實侍應都好留意每枱食客動向，見客人用餐完畢，就即清理整潔，服務無怠慢。
每張餐桌旁都有斟水器，客人自己斟水或茶，方便。
新店開張，除咗 gimmick 都講「食」力，只限 YOHO MALL 新店推出的兩款套餐，$108 位的經濟套餐有杏汁燉白肺、鮑魚汁炆鳳爪、秘製瑤柱荷葉飯及熱香檸薏米水，一湯一飯一餸加飲品，分量適中，其中杏汁燉白肺好滋潤。另一款 $128 的套餐則有陳醋雲耳、龍蝦濃湯拉麵配雲吞、半月叉燒卷、焦糖排骨、熱香檸薏米水及招牌棗皇糕，抵食。兩款套餐推廣期到 10 月 30 日，想體驗一下新 service 兼限定菜式已快手。
$108 位套餐包杏汁燉白肺、鮑魚汁炆鳳爪、秘製瑤柱荷葉飯及熱香檸薏米水，只限新店供應，數量有限。
兩款 YOHO MALL 新店限定新點心，前者係「半月叉燒卷」($18)， 坊間少有漂亮貝殼形叉燒卷，叉燒釋放油份及香氣，無額外加油，香口得來不油膩。而芹香鮮蝦春卷（$24） 加入西芹提升咬口感及香味，好清新。
利小館（元朗店）
地址：元朗 YOHO MALL 形點 2 L2 A217舖
電話：2954 0028
營業時間：11am-11pm
文：Celia、攝：Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
