灣仔築地咩來頭？
為免大家唔記得，容許我長氣啲，介紹多一次灣仔築地來頭。
名稱：灣仔築地‧山貴水產市場
地點：灣仔碼頭 2 樓
經營：日本築地市場內最具規模嘅批發商「山治集團」
佔地：1.1 萬呎，可容納 400 人
分區：零售區、水果區、菓子、糧油區、外帶區、熟食區、龍蝦包區、抹茶區、浜燒海鮮區、海鮮丼區、立食壽司區、海鮮區，稍後有梅酒區和漬酒專櫃
開幕日期：預計 10 月初，確實日期仍尚待公佈
詳情：bit.ly/2cSggRi
必食 1：$238 藍鰭吞拿海鮮丼
水產市場入面可以坐低食嘢嘅地方，就只有海鮮丼區及浜燒區。嚟到水產市場梗係要食至新鮮嘅刺身，想飽肚食海鮮丼就最啱！海鮮丼區有 36 個座位，雖然唔係望海景，但可以睇住天星小輪泊埋碼頭！好閒情㗎！
特上山貴丼 $238
咩都想試？推介你吃特上山貴丼，夠晒大堆頭，幾乎乜都齊晒！原隻松葉蟹鉗、龍蝦肉、三文魚籽及 10 多款包括藍鰭吞拿嘅角切魚生。松葉蟹鉗及龍蝦肉好爽彈、味道鮮甜。角切魚生滲出陣陣魚油香，唔錯！食海鮮丼嘅方法都跟足日本傳統，可以直接食，或者用紫菜包刺身及飯製成手卷。食到最後仲可以加鰹魚煮成嘅高湯，製作茶漬飯。$238可以食到藍鰭吞拿、又有松葉蟹，最抵！
海膽丼 $268
海膽丼嘅賣相都好吸引，6 至 7 片海膽鋪於飯面。橙黃色大大片，不過海膽唔係日本貨，而係加拿大海膽。食落唔算勁鮮甜，不過勝在海膽夠厚身又大大片。丼飯配紫菜及雞蛋絲，增加味道層次。只是畀 $268 都食唔到日本海膽，有啲失望。
必食 2：即捕即燒 超新鮮浜燒
要食海鮮嘅鮮甜滋味，刺身、海鮮丼唔係唯一選擇。場內有另一個可以坐低慢慢歎嘅浜燒區，設有 21 個座位，席前有多款包括蟹、龍蝦等冰鮮海鮮選擇。
有無游緊水嘅海鮮揀？有！浜燒區旁邊設有 3 個大魚缸，放咗鱈場蟹、阿拉斯加龍蝦、象拔蚌、鮑魚等新鮮海產。客人揀啱心水，可以叫師傅即劏即燒，點會唔好食？
為免影響海鮮原味，所有海鮮都只以鹽燒處理，燒嘅時候會噴上清酒增添香味。師傅控制火候功架十足，海鮮唔會燒到乾爭爭。
浜燒區內設有 3 個電爐，開放式廚房設計，令客人可以近距離睇住師傅燒海鮮。
即燒鱈場蟹腳 價錢待定
想味道更加豐富，每款即燒海鮮都會配 3 種醬汁食。麵豉汁可以用嚟點肉，酸甜檸檬蟹醋用嚟為海鮮提鮮味，而鮮橙酸汁則是百搭。浜燒區嘅食物價錢未定，抵唔抵食說評論唔到，但客人可以自己揀海鮮，再由師傅即劏即燒，一定新鮮。
必食 3：$88 抵食壽司拼盤
全場最大嘅區域之一，就係立吞壽司區，設有 132 個企位，雖然要企，但勝在對正維港，可以望住海景食壽司。
壽司盛合 $88
呢個區域唔單止可以食到壽司，仲可以歎埋海鮮拼盤及刺身。壽司盛合暫定 5 款，全部即場製作。配搭全是時令選擇，暫時會有深海池魚、和牛等。行政總廚高敏慎透露，水產市場所有海鮮都由日本空運到港，除咗星期日之外，每日都有新鮮貨直送，保證新鮮。用 $88 就食到日本直送海產製作成嘅壽司，真心抵。
鮪魚壽司盛合 $148
最多人鍾意係鮪魚 set，一碟有齊赤身、中拖羅、大拖羅等不同部位。拖羅魚油豐腴，輕輕炙燒，油脂滲出，更香！行政總廚仲話，佢特別選用日本新潟米，飯粒飽滿又夠黏性，充滿米飯香。
生蠔拼盤 價錢待定水產市場會於全球搜羅當造嘅生蠔，今期就入咗 3 款法國生蠔。啲蠔大大隻又厚身，想要海水味重嘅有，想要 creamy 嘅都有！
必食 4：黃婉曼主理原隻龍蝦包
曾於東京修讀法國藍帶廚藝學院麵包課程嘅黃婉曼，都受到山貴水產邀請嚟開舖，帶嚟勁足料龍蝦包，佢仲搵咗法籍麵包師做顧問。
（左）龍蝦包$168/ 全隻、$98/ 半隻
去日本藍帶學藝真係唔係玩玩吓，龍蝦包可以揀軟身或硬身嘅法包。今次試咗軟身麵包，老闆娘話麵包用咗日本及法國 T50 麵粉加乳酪芝士製作，包身鬆軟有麥香，食落甜甜哋。夾住嘅係由水產市場供應嘅波士頓龍蝦，可以揀勁量版原隻，或者輕食版半隻嘅分量。龍蝦先蒸好拆肉，再以法國無鹽牛油及黑椒簡單調味，彈牙之餘仲食到龍蝦味。再配風乾 3-4 小時嘅車厘茄及蔬菜。醬汁用咗西芹、洋葱等多種蔬菜調配，味道酸酸哋，仲可以咬到爽口嘅蔬果粒。雖然價錢貴咗啲，但質素好有驚喜喎！
築地搵食小貼士：
晚上嚟最好！
行完一轉，個人覺得築地．山貴水產市場嘅格局唔太似東京築地，反而跟台灣嘅上引水產好似樣！點都好啦，最緊要係有日本直送刺身食嘛，每日下晝大約 3 點就會送到，想食最新鮮嘅海鮮、刺身，要夜晚嚟！
各區唔互通！
提提大家，頭先提過嘅海鮮丼區、浜燒區及立吞壽司區唔可以互通。即係話唔可以係浜燒區食海鮮丼，又或者將立吞壽司區嘅壽司刺身帶去海鮮丼度食。你想食勻 3 個區，就要分別排隊入場，食完一區再去下一區，有啲唔方便！所有大家入場前最好留定肚、諗定想食乜，早啲拎籌排隊喇！
築地．山貴水產市場
地址：灣仔碼頭二樓
網站：www.yamataka.hk
開幕日期：預計 10 月初
如何前往：
• 從尖沙咀天星碼頭乘坐天星小輪到灣仔碼頭
• 從港鐵灣仔站 A1 出口，沿行人天橋往香港會議展覽中心方向，至港灣道後再轉往會議道，約 15 分鐘
文：Jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
