灣仔築地．山貴水產市場位於灣仔碼頭 2 樓，由尖沙咀搭船過灣仔，一落船就見到，好方便。灣仔築地是由日本築地市場內最具規模嘅批發商山治集團主理經營。
地方不小，佔地 1.1 萬呎，可以容納 400 人。場內嘅裝修參考日本築地市場嘅設計，以木系為主要元素，一貫和式格調。簡單介紹吓，場內分零售區、水果區、菓子、糧油區、外帶區、熟食區、龍蝦包區、抹茶區、浜燒海鮮區、海鮮丼區、立食壽司區、海鮮區，遲啲會有梅酒區及清酒專櫃，好多嘢睇！
一入門口是零售區，大大個貨架放滿來自日本嘅零食、魚乾仔等。
水果專區有來自日本嘅時令水果，唔高級唔賣，好似香印青提、靜岡蜜瓜等。每日由日本直送，保證新鮮。
再行入啲就有糧油專區，兩大個貨架放咗日本米、醬油、烏冬及麻油等。
糧油區旁邊嘅外帶專區，有幾個大雪櫃，刺身、壽司、海鮮丼等陳列晒冷，大家可以買返屋企，或者去碼頭 3 樓花園平台，吹住海風、睇住維港靚景慢慢歎。
外帶區附近有熟食區，師傅會現場即煮各款便當，灣仔 OL 有福了！
日本好 hit 嘅龍蝦包都有呀！呢個龍蝦包區，由曾於東京修讀法國藍帶廚藝學院麵包課程嘅黃婉曼主理，佢仲搵咗法籍麵包師做顧問㖭！
（左）龍蝦包 $168/ 全隻、$98/ 半隻
龍蝦包可以揀軟身或硬身嘅法包 ，夾住嘅係波士頓龍蝦，可以揀勁量版原隻，或者輕食版半隻。再配風乾 3-4 小時嘅車厘茄及蔬菜。醬汁用咗西芹、洋葱等多種蔬菜調配，味道酸酸哋。
（右）墨汁海膽包 $68
原創作品，特別用咗歐洲入口墨汁製成，經過 24 小時低溫發酵而成。包內是加拿大海膽製成嘅海膽醬，仲有原片海膽喺上面！
食完龍蝦包點會夠飽？行入兩步食埋浜燒！浜燒區設有 21 個座位，席前有多款冰鮮海鮮選擇。
旁邊設有 3 個大魚缸，放咗蟹、鮑魚等新鮮海鮮。客人揀啱心水，可以叫師傅即劏即燒，鮮味爆燈！
即燒鱈場蟹腳及龍蝦，全部以鹽燒處理。燒嘅時候會噴上清酒增添香味。麵豉汁、鮮橙酸汁及檸檬蟹醋，分別用來配肉類、蟹、貝殼類等。
海膽丼 $268
非吃刺身不可嘅朋友，行過對面就見設有 36 個座位嘅海鮮丼飯區喇！海膽丼鋪上至少 6 片海膽，橙黃色嘅海膽大大片，非常鮮甜。
特上山貴丼 $238
有原隻蟹鉗、龍蝦肉、三文魚籽及 10 多款角切魚生。海鮮丼可以直接食、用紫菜包刺身及飯製成手卷以及加高湯即成茶漬飯。
海鮮拼盤 $368
行到最後排是立吞壽司區，全區設有 132 個企位，呢個區域可以食到海鮮拼盤、壽司及刺身。海鮮拼盤有原隻龍蝦、生蠔、翡翠螺及鮑魚等。
鮪魚壽司盛合 $148
鮪魚 set 有赤身、拖羅等不同部分，食出不同口感味道。
壽司盛合 $88
壽司盛合暫定 5 款，全部即場製作。配搭全是時令選擇，暫時會有深海池魚、和牛等。
INFO
築地．山貴水產市場
地址：灣仔碼頭二樓
網站：www.yamataka.hk
開幕日期：預計 10 月
如何前往：
• 從尖沙咀天星碼頭乘坐天星小輪到灣仔碼頭
• 從港鐵灣仔站 A1 出口，沿行人天橋往香港會議展覽中心方向，至港灣道後再轉往會議道，約 15 分鐘
文：Jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
