一杯好飲嘅芝士奶蓋抹茶，應該要……
要做一杯好飲嘅芝士奶蓋抹茶唔簡單，唔係求其沖好抹茶底，再倒芝士奶蓋就得。一杯令人飲完會返轉頭 encore 嘅芝士奶蓋抹茶，要符合以下標準：
1. 芝士奶蓋厚度：要夠厚！奶蓋薄薄一層，視覺效果已經扣晒分！仲要飲兩啖就食晒啲奶蓋，咪要淨飲抹茶囉！NO！
2. 芝士奶蓋味道：呢層芝士奶蓋主要以忌廉芝士、鮮奶等製作而成，味道應要有芝士嘅鹹香，又有鮮奶嘅味道。
3. 芝士奶蓋口感：最緊要夠滑！飲落順喉又綿厚最正。
4. 抹茶味道：茶味清香有茶味有回甘，唔會太甜。
1. 芝士奶蓋先鋒 皇茶 19 分
「皇茶」呢個名可能比較陌生，但上網翻查資料，佢哋自稱係首創芝士奶蓋嘅品牌，今次 battle 又點可以無佢呢？皇茶選用澳洲芝士製作招牌芝士奶蓋，足足有 3.5cm 厚，是眾店之首！芝士奶蓋面仲有少少抹茶粉，賣相吸引。用可揭式杯蓋，飲嘅時候唔好用飲管，將杯身傾斜 45 度飲。不過芝士奶蓋極厚身，飲時再大力吸啲奶泡，咁先可以又飲到芝士奶蓋又飲到抹茶。
皇芝士字治抹茶 $22
選用日本宇治抹茶沖調，茶味突出又清香而且無苦澀味，茶底甜度恰到好處，好飲。
3.5cm！好厚嘅芝士奶蓋呀！口感豐厚好滑溜！味道出色，真係飲到忌廉芝士嘅香味，就咁食芝士奶蓋會膩，但 mix 埋抹茶一齊飲，剛好中和芝士嘅飽滯。
採用可揭式杯蓋，建議用 45 度角打斜杯身飲用。不過芝士奶蓋太厚嘅關係，飲時要用力吸啜至食到奶蓋。
小評：
1. 芝士奶蓋厚度：★★★★★
2. 芝士奶蓋味道：★★★★★
3. 芝士奶蓋口感：★★★★★
4. 抹茶味道：★★★★
總分：19 分
皇茶 Royaltea
地址：炮台山電氣道 308 號 C4B 舖
電話：3702 1250
營業時間：11am-9pm
2. 飲不到的奶蓋 歇腳亭 8 分
「歇腳亭」呢排憑一系列變色蝶豆花飲品，再次擠身人龍店。原來店內都有一系列芝士奶蓋飲品。芝士奶蓋可配紅茶、烏龍茶、綠茶及抹茶。店員解釋，貴 $2 嘅抹茶，茶味會比賣 $18 嘅綠茶香，分得好仔細。芝士奶蓋抹茶用膠蓋完全封好，一定要用飲管！但咁飲法只飲到底層嘅抹茶，失去飲奶蓋嘅樂趣！想用完美嘅 45 度角飲，要粗暴地整爛膠封蓋，可惜抹茶入面有大大粒冰，飲奶泡時又要頂住冰粒，唔好一齊飲落肚，好麻煩！
起司奶蓋抹茶 $20/ 大、$18/ 中
茶色明顯較淺！啜一啖，說好的茶味呢？抹茶味淡到不得了，糖漿嘅死甜反而更明顯。
沖好抹茶底後再倒入預先打發好嘅芝士奶蓋。
芝士奶蓋厚約 3cm，不過成杯茶高 15cm。計番個比例，分量唔算多。芝士奶蓋帶好輕微嘅鹹味，然後是一陣奶粉味道！奶蓋質感稱不上滑溜，但不至於嚡口，不過唔夠豐厚。
小評：
1. 芝士奶蓋厚度：★★★
2. 芝士奶蓋味道：★★
3. 芝士奶蓋口感：★★
4. 抹茶味道：★
總分：8 分
歇腳亭 Sharetea
地址：銅鑼灣謝斐道 518 號渣菲大廈地下 A 舖
電話：2321 7388
營業時間：11am-10pm
3. 葵廣至 hit 茶芝味 16 分
憑一杯芝士抹茶奶蓋，成為葵涌廣場新晉人氣熱店！招牌芝士抹茶奶蓋，日賣近 90 杯！抹茶粉用日本貨，沖調時只加少少糖提味，面層嘅芝士奶蓋有 2.5cm 厚。負責人話，芝士奶蓋用牛奶及忌廉芝士等每日新鮮即打，口感幼滑豐厚綿滑，好似食緊慕絲嘅感覺，味道甜甜哋又帶芝士嘅鹹味。
芝士抹茶奶蓋 $30
選用日本抹茶粉沖調而成嘅抹茶底，茶味清香帶少許回甘。抹茶嘅甜度適中，唔會因為太甜而蓋過茶味。
大大羹芝士奶蓋倒於抹茶上面。
約 10cm 高嘅茶，芝士奶蓋厚佔咗 2.5cm，計番比例都算多。
同樣打開個蓋用 45 度打斜飲，就可以又飲到茶又飲到奶蓋。
小評：
1. 芝士奶蓋厚度：★★★★
2. 芝士奶蓋味道：★★★★
3. 芝士奶蓋口感：★★★★
4. 抹茶味道：★★★★
總分：16 分
茶芝味
地址：葵涌廣場 1 樓 B07 號舖
營業時間：12nn-10pm
查詢：(ig) CheeseTea.international
總評：皇茶 勝！
「皇茶」及「茶芝味」嘅出品好接近！一個是首創芝士奶蓋嘅先鋒，另一個是後起之秀。兩者之間嘅差距唔算太大，不過論芝士奶蓋及茶嘅味道，皇茶的確略勝一籌。皇茶嘅芝士奶蓋質地，比茶芝味更豐厚、順滑。最重要是芝士奶蓋有明顯嘅忌廉芝士味，唔係只得芝士鹹鹹哋嘅味道，自稱首創水準果然有番咁上下！
文：Jessie；攝：Jessie、Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
