呢款咁具創意的手卷出自一間叫「橫濱水手」嘅日食小店，喺觀塘工業區一幢大型商廈內。佢可以話係一間手卷專門店，店中單係手卷類已有超過 40 款！除手卷外，亦有海鮮丼飯、剌身及日式小食等，選擇多多，價錢十幾蚊起跳，好受區內打工仔歡迎。當中鵝肝手卷係繼海膽手卷之後最貴嘅，亦頗受年輕潮人歡迎，質素係點？
燒鵝肝手卷 $32 （新張優惠期價錢 $22）
鵝肝有 3 塊，睇落似厚切午餐肉，睇得出揼本。鵝肝表面煎到金黃色脆皮，賣相一流。齋睇已感受到嗰種邪惡，但配上甜甜的蘆薈粒、青瓜絲及壽司飯，感覺無咁油膩。即叫即製，手卷拿上手暖呼呼，鵝肝外脆，內裏 creamy，好甘香。分量足，女仔食一個已經係一個 lunch。
蟹膏蟹籽蟹腳捧手卷 $25
店內另一特別手卷，橙色蟹籽好搶眼，蟹膏目測不算多，但食落蟹膏味超級濃兼搶鏡。加上咬爆蟹籽的口感，正。
芝士燒鰻魚手卷 $21
燒至微焦的芝士半融喺鰻魚表面，好誘人！芝士、鰻魚及鰻魚汁的味道分明，一齊食甜中帶鹹，鰻魚口感肥美，值得一試。
店內提供 5 款醬汁，客人可按喜好配搭，燒鵝肝手卷建議落少少（2 至 3 滴）芥辣豉油，可令感覺更清爽。其餘兩款唔使加醬已夠味。
橫濱水手
地址：觀塘成業街 7 號東廣場地下 53A
電話：9089 4898
營業時間：11am-9pm
文、攝：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
