呢個世代，無人自製湯丸㗎喇！芝麻花生紅豆湯丸統統 Out！綠茶湯丸先係大流行！市面上唔同牌子都不約而同推出咗綠茶味湯丸，有的配紅豆，有的配玫瑰，你鍾意邊款？
1.小寧波綠茶紅豆湯圓 150 g （10 粒） $42.9 （AEON 有售）
未放水煮滾前，睇外皮顏色已經覺得綠茶味濃。最方便係唔使解凍，煮 1 至 2 分鐘浮面後食得，煮熟後顏色更顯深綠，咬一口已有綠茶的苦味，綠茶控應該好 buy。裏面係紅豆餡，分量算多，紅豆蓉口感有啲似慕絲，由於外皮茶味濃，可中和甜膩。
未煮前外皮顏色是深綠色。
煮熟後顏色更顯深綠，咬落茶味濃。
紅豆蓉分量多，呈慕絲狀，滑！
2.灣仔碼頭抹茶水晶湯丸 300 g（20 粒） $22.9 （AEON 有售）
睇包裝，見到水晶湯丸晶瑩剔透嘅外表，好期待。未煮前外皮與普通湯丸顏色無乜分別，但煮熟後才見外皮變水晶皮，抹茶餡浮現成綠色，至於咬落水晶皮比一般糯米皮更滑和煙韌，抹茶餡還有一陣濃郁奶香，香香甜甜，味道有驚喜！
未煮前外皮與普通湯丸顏色一樣。
煮熟後抹茶餡浮現成綠色。
抹茶餡還有一陣濃郁奶香，有驚喜！
3.Fresh To Go 玫瑰花紅豆湯丸 180 g （9 粒） $30 （MARKET PLACE 有售）
Fresh To Go 係香港製造品牌，佢推出嘅呢款玫瑰花紅豆湯丸，餡料用天然法國玫瑰花，滲入新鮮紅豆蓉炮製，食落首先彈出嘅係濃郁玫瑰香味，不過好彩唔似假花香味，紅豆蓉 mix 埋稍為過甜，不過食花香湯丸女士一定 like。
外皮係糯米皮，無乜特別。
煮熟後 size 大粒，女士食一、兩粒夠晒。
玫瑰餡混合紅豆蓉，有點偏甜，不過女士對玫瑰嘅熱愛同執着，一定會包容。
售賣點：
AEON
地址：九龍城賈炳達道 128 號 KCP 九龍城廣場 2 樓至 3 樓全層
電話：2662 8888
MARKET PLACE
地址：大埔八號花園
電話：2664 3205
文、攝：celia
歡迎你 like 我哋 U Food Facebook Page / U Food Instagram ，取得我哋更新更快嘅資訊！
