一件好食嘅燒腩仔，應該要......
今次個battle嘅係燒腩，唔係普通燒肉！燒腩者， 又稱為火腩，稱得上好食要符合以下標準：
1 肥瘦比例：脂肪及瘦肉要層層相間，約有四至五層為佳， 最底層連骨，食完可以噒骨頭！唔可以第一啖咬到係肉， 下一啖全肥膏，諗起都打冷震！
2 肉質：鬆化、軟腍無渣！肥瘦相稱均勻，入口即化又唔沒油膩，食到肉香。
3 味道：有炭火燒烤嘅香氣最正！ 但有炭火牌嘅燒味店唔多，即使無炭火味， 都唔可以鹹到乸脷兼蓋過豬肉味，有肉味有油香為之正。
4 外皮：脆卜卜！咬落好似食薯片咁脆，皮下唔好太多脂肪， 如果咬落滲油，個皮幾脆都要扣分！
5 價錢：平！價錢合理，斬多斤都唔會肉痛！
獨特炭香 添記 18 分
位於元朗冬菇亭，開業 30 多年，於區內無人不識！ 添記用不銹鋼炭燒太空爐，以唔易碎嘅新加坡炭燒烤！真係炭燒！燒味每日出 3 轉，數量有限，12 點前就賣晒！燒腩肥瘦均稱， 層層相間，咬落有肉汁、有豬肉味兼有陣陣炭火香！ 肉質夠腍又嚼勁，即使放涼咗燒腩外皮仍然好脆！
燒腩 $125/ 斤
燒肉肥瘦均勻、層層相間。
外皮起晒芝麻皮，一咬勁脆又鬆化！
| 小評：（以 5* 為滿分） |
添記燒臘飯店
地址：元朗建業街熟食亭 C5 店
電話：2476 1742
營業時間：8am-3pm
嚼勁十足 永合隆 14分
太子 50 多年老字號，最出名係招牌燒腩。晚市時段， 燒腩一出即於短時間內被掃清，就連老是常出現嘅發哥都係粉絲！ 永合隆是碩果僅存、以開放式炭爐燒豬嘅燒味店。 重 50 斤嘅豬橫放炭火上燒，每隻要燒足 45 分鐘， 每日燒嘅豬唔會多過 10 隻！大部分嘅燒腩都有 4 至 5 層肥、瘦肉，層層疊。燒腩每件斬得較厚身，好在肉質夠腍， 咬落口感豐富。爆起芝麻皮，但放涼後略為變腍唔太脆。 豬肉有肉汁但同是食到少許豬臊味，底層有骨嘅位置味道偏鹹， 扣分位！
燒腩 $240/ 斤
燒肉夠腍，但近骨位置味道太鹹。
外皮都係芝麻皮，熱辣辣咬好脆，放涼咗就腍，比較失色。
| 小評 肥瘦比例：***** |
永合隆飯店
地址：太子砵蘭街 392 號
電話：2380 8511
營業時間：11am-10pm
肉質鬆化 龍記 14分
中環上班族最愛！放 lunch 時段堂食爆晒棚， 等外賣嘅都圍滿成間舖！燒腩用新鮮豬，肉質鬆化好腍， 燒腩肥瘦相間！豬肉帶帶微微炭香， 肉味偏甜唔太鹹，有肉汁。
燒腩 $176/ 斤
燒腩咬落肉汁豐富，味道偏甜帶炭香。
外皮脆卜卜，即使放咗 2 個鐘再食都仍然脆口。
| 小評 肥瘦比例：**** |
龍記飯店
地址：中環域多利皇后街 12 號地下
電話：2545 5328
營業時間：7am-10pm
肉質最腍 永祥 8分
跑馬地老字號燒味店，出名到連遊客都要專程拜訪。 燒腩有瘦肉及脂肪，但肥肉部分比較厚，所以食落明顯比較腍， 豬肉唔硬唔嚡口。腍就夠腍，但又少咗種嚼勁。味道唔太鹹， 可惜豬臊味好濃，食完停留於口腔不散的味道不太討好。
燒腩 $144/ 斤
外表都算脆，但豬臊味實在太強。
| 小評 |
永祥燒臘飯店
地址：跑馬地景光街 2 號地下
電話：2573 9082
營業時間：9am-10:30pm
總評：
添記 勝！
無得輸！炭火燒烤陣味真係唔同啲！其實今次大比拼嘅舖頭，質素都好高， 但一拍埋比較真係有明顯分別！添記唔單止勝在有陣獨特嘅炭火香， 燒腩肥瘦均勻，肉質腍但唔鬆散，有豬肉香卻沒有豬臊味， 味道醃得剛好，唔會太鹹搶走肉味，確係出色！畀多個貼士大家， 斬料時唔好買預先切好嘅燒肉，因為切開後好快攤凍， 肉汁亦會流失，唔好食㗎！
文：jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
