呢個「茶餐廳」 cupcake 系列是以經營烘培裝飾及售賣 cupcakes 起家的 Twinkle Baker Decor 的新搞作。舖頭最近重整旗鼓，希望 cupcake 加入本土元素，於是找來本土文化及粵語專家歐陽偉豪（Ben Sir）親自取名的「扮清糕 By Twinkle」系列，大玩食字 gag；「茶餐廳」就是頭炮新品。
系列中共有 8 款口味，都是大家常在港式茶餐廳見到的飲品和食品，如奶醬多、凍檸茶、菠蘿油、奶茶、凍檸賓、紅豆冰、咸檸七及港式奶茶等，款款設計獨特，好似 cupcake 會以茶餐廳紙杯代替蛋糕紙托住，飲品味蛋糕仲插住支飲管！菠蘿油味真係似菠蘿油！內有乾坤，賣相與味道都玩味十足。
（左）鹹檸七 $28/ 個
在檸檬味 cream 上放新鮮青檸，賣相似足一杯鹹檸！第一啖味道鹹鹹地，之後又有七喜的甜味，感覺好得意。
（右）菠蘿油 $28/ 個
上層造成菠蘿皮，加上厚切牛油，同真‧菠蘿油一樣咁邪惡！底層由麵包變成蛋糕，估唔到味道都好夾。
（左）好立克 $28/ 個
蛋糕上放滿以好立克造成的 cream、麥餅及好立克麥精糖，連蛋糕都以好立克製成，啖啖食出濃郁的麥芽味。
（右）奶醬多 $28/ 個
放滿細細多士再淋上煉奶，連 cream 都有淡淡的花生醬味。
（左）港式奶茶 $28/ 個
以奶茶造成頂層的 cream 及蛋糕，再灑上紅茶葉碎，茶味香濃，真係似飲奶茶一樣。
（右）紅豆冰 $28/ 個
厚厚的紅豆 cream 再放上紅豆粒，抹勻吃，紅豆味甚香，不會過甜。
凍檸賓
以焦糖檸檬、利賓納忌廉及利賓納軟糖在放上層，感覺夠晒繽紛，酸酸甜甜，得意！
凍檸茶
同樣有焦糖檸檬及紅茶製成的 cream，茶味香濃，又有檸檬的酸味，仲有原片檸檬和飲管做裝飾，搞笑！
「茶餐廳」系列不只賣相得意，內裏有乾坤，好似鹹檸及紅豆冰，蛋糕中間藏有話梅肉，另一款就藏紅豆蓉。
買一款「茶餐廳」系列 cupcake，附送一款由 Ben Sir 設計的廣東話旗仔，真係可以食 cake 學廣東話。
除 cupcake 外，Twinkle 的冬甩亦甚受 OL 歡迎，傳統綠茶、朱古力及伯爵茶味外，更有楓糖煙肉、紅莓香草忌廉芝士及草莓軟心忌廉口味，是店中的 Top 3。買冬甩更可以套餐價買一杯即磨咖啡，咖啡蓋造成 cupcake 形狀，賣相吸引。
（前）楓糖煙肉
甜冬甩就食得多，鹹鹹哋又幾過癮，楓煻的甜味中和煙肉的鹹，配咖啡一絕。
（中）紅莓香草忌廉芝士
無諗過香草加上 cream cheese 放在冬甩上，香軟 creamy，香草的獨特香味提升了紅莓乾的果味。
（後）草莓軟心忌廉
上層是草莓及忌廉，內藏草莓味乳酪，味道相當夾。
Twinkle Baker Decor
地址：尖沙咀東部麽地道 63 號好時中心 2 樓 282 號舖
電話：2114 0052
營業時間：星期一至五 8:30am-8pm，星期六及日 11:30am-8pm
註：冬甩單買 $12；一件自選冬甩配咖啡 $25、兩件自選冬甩配咖啡$32
文：Theo、攝：Ken
歡迎你 like 我哋 U Food Facebook Page / U Food Instagram ，取得我哋更新更快嘅資訊！
