唔睇過唔知，原來而家夾糖嘅選擇好多元化，除咗貼地平民商場小店，連 IKEA 都有糖夾，有啲糖果店又走高檔路綫，好似 IKEA、Bears & Friend、FANTASIA 等，無論邊種風格，都充滿甜蜜回憶！
大埔人都夾佢 米奇糖果
新界區可以夾糖嘅地方都幾多，例如葵廣及其他屋邨商場士多，隱藏好多夾糖好去處。我係大埔人，想食夾糖，就一定係去大埔廣場嘅「米奇糖果」。小店老闆娘王太指糖果舖已經開業 16 年，「我記得係 2000 年 6 月 1 日開張嘅。」記得咁清楚，對她來說不只係糖果店咁簡單，而且滿載人情味及回憶。「開舖時好多細佬女嚟夾糖，有啲唔生性唔肯讀書，畀我鬧到大，最後仲讀埋大學。」嚟夾糖並非機械式的夾完畀錢走人，而係建立了街坊感情。
糖果都係細個時食的經典款式，砂糖可樂糖、荷包蛋糖、蟲蟲軟糖……舖頭每天 12nn 開門，直到 10pm 才收舖，有人咁夜仲夾糖嗎？「好多女仔放工返大埔先趕嚟夾糖，通常 8pm 打後先多人。」放工趕嚟夾糖嘅女仔，都係由小夾到大嘅學生妹，到現在還喜歡夾糖，童真未變。
經典沙糖可樂糖，見過有可樂怪會夾成包清一色可樂糖。
小記特別愛食黑色及紅色糖，呢隻黑莓及紅莓軟糖唔使煩。
荷包蛋糖又係好經典，不過咬落有啲實，仲有少少奶香味。
蟲蟲軟糖，形狀似蚯蚓。
砂糖士多啤梨糖，咬落有啲黐牙。
海豚軟糖
棉花糖重量較輕，細個時有朋友為慳錢會夾一包棉花糖，其實價錢差不多。
砂糖士多啤梨味長條糖，味道較濃郁同有咬口，一般價錢都比其他軟糖貴。
砂糖青蘋果味闊條糖
拆開一小包賣的單一口味軟糖，每包 $5。
紙盒內是王太替即將結婚的客人留起的軟糖，打算在婚禮上派發，寫上「不要動」是怕丈夫不知情賣掉。
小店以賣夾糖為主，還有汽水、飲品、薯片等零售。
王太指四、五年前有幾位中大學生曾替小店整了一個 3D 紙版模型，隨後送給她做紀念，她一直用膠袋包著珍而重之。
丈夫王生每日都將糖果紙皮盒摺得整齊放門外，等一位婆婆來回收。
米奇糖果
地址：大埔廣場 2 樓 33 街 13 號舖
電話：從缺
營業時間：12pm-10pm
價錢：$6.8/100g
德國天然熊仔糖 Bears & Friends
除咗充滿本土情懷嘅夾糖店，我最喜歡來自德國嘅天然果汁軟糖 Bears & Friends。香港店係品牌喺亞洲首間專門店，糖果都以天然鮮果汁製造，不含香味及添加劑，果味好濃郁，而且味道較 fresh，當然價錢亦較貴。由即日起到 9 月 30 日，所有 200g 包裝糖享有九折「中秋節優惠」，把握抵食機會喔。
Megabox 分店有紅色大熊仔 figure 做生招牌。
軟糖架分門別類，客人用膠杯盛載軟糖。
膠杯有 Bears & Friends 熊仔 logo，實認得佢。
西柚檸檬薯條酸味夠勁。
冰粒食落係薄荷味，幾清涼。
見到咁多皺摺，成個腦袋咁，原來呢隻糖叫「聰明腦」。
浪漫紅玫瑰，真有點 rose 甜味。
砂糖西瓜
甜心軟糖
Bears & Friends
地點：尖沙咀海港城海運大廈 3 樓 LCX K13 號鋪 / 九龍灣 MegaBox L8 Kiosk 2
電話：2381 0086
營業時間：10am-10pm
價錢：$18.5/100g
瑞典 style 夾糖 IKEA
「LORDAGSGODIS」係瑞典語「星期六糖果」嘅意思。原來瑞典傳統將星期六定為糖果日，小朋友可以喺 happy Sat 去買糖食，而香港最接近瑞典糖果嘅地方係 IKEA 宜家，食品部都有夾糖區，二、三十種北歐風味糖果任夾落紙袋中。不過北歐人喜歡的口味，例如怪味甘草糖可能香港人會食唔慣，幸好有傳統可樂糖、棉花糖等，仲有殭屍牙、烈焰紅唇等造型，好 cute，小朋友見到實喜歡。
IKEA 都有得夾糖，可能唔係好多人知。
大大塊愛心軟糖：紅是激情、橙是溫暖、綠是和平。
動物軟糖好 colourful，不過口感有啲膠。
幸運數字三角糖，酸味味青蘋果味。
甜筒軟糖，賣相唔討好。
黃蝴蝶軟糖充滿檸檬酸味。
香蕉棉花糖食落煙韌。
好大塊熱情紅唇軟糖，係士多啤梨味，so sweet！
殭屍牙軟糖，例牌會將糖咬住扮殭屍。
青骷髏軟糖，好有海盜風情。
IKEA
地址：九龍灣 MegaBox L4
電話︰3125 0888
營業時間︰10:30am-10:30pm
價錢：$13/100g
旺角就手夾 Pig Pig Candy
要夾糖又點少得去 MK 朝聖，咁多少男少女之地，夾糖店亦多過人。其中一間「Pig Pig Candy」走清新路綫，裝修亮麗燈光通明，種類算幾多。除咗 MK，淘大、山頂廣場、 cwb 東角商場、康怡廣場同香港仔利港中心都有分店，算係中型糖果店規模。
好大隻傻豬豬 logo 做招牌。
店內有超過 84 種夾糖可選擇，夾到眼花。
波子汽水味軟糖，加上酸沙，味道酸爆。
青蛙軟糖造型幾 Cute。
蝴蝶軟糖
便便型狀嘅棉花糖
企鵝軟糖
PIG PIG CANDY
地址：旺角新之城 1 期 1 樓 119 號舖
電話：3427 9662
營業時間：1pm-10:30pm
價錢：$8.9/100g
旺中人氣小店 糖街
旺中除了升格為新晉小食市場，都仲可以搵到夾糖小店，有間叫「糖街」嘅夾糖舖，裝修及格局的骰，但軟糖種類都有六、七十種咁多，下之行過旺中覓食，可以順便去買埋夾糖。
糖街夾賣其他種類零食。
除了夾糖，另有獨立包裝軟糖賣。
小小店面，大大糖櫃。
扭紋夾心棉花糖
紫薯牛奶硬糖
酒味橡皮糖
大可樂樽軟糖
半生熟香蕉
糖街
地址：旺角中心 3 樓 TK5A 號舖
電話：6076 6976
營業時間：1pm-11pm
歐式浪漫 FANTASIA
介紹咁多間本土夾糖小店後，最後嚟一間充滿歐洲浪漫情懷嘅自助糖果店。FANTASIA 分別係太古城及沙田開店，室內裝修都充滿摩登味，售賣超過 200 款來自德、美、英、法國的糖果，其中軟糖就有約 180 款。店內亦有一枝枝超靚波板糖，手造全花棒棒糖，中間透明可睇到食用花，靚絕，女生見到一定心花怒放。糖店介提供紙盒將軟硬糖、朱古力可放得整齊，送禮好大方。
糖店提供漂亮紙盒可分隔不同糖果，放禮自用都好大方得體。
軟糖用天然果汁製造，成份天然。
英國手造全花圓形棒棒糖 $75、英國手造全花心形棒棒糖 $88
整間糖店以玻璃做間隔，光鮮明亮。
FANTASIA
地址：沙田新城市廣場三期 1 樓 A161 號舖
電話：2606 0128
營業時間：10am-10pm
價錢：$40/100g
文：Celia、攝：Jessie、Celia
歡迎你 like 我哋 U Food Facebook Page / U Food Instagram ，取得我哋更新更快嘅資訊！
