米線陣嘅 $68 肥牛帽子火鍋，雖說係一人一鍋，但分量十足！跟餐有十幾款配料，包括菜肉餃、扎肉、牛丸、魚蛋、油條、豆卜、番茄、蘿蔔、鮮冬菇、芫荽、紅椒及米綫，超豐富！仲送 1 杯招牌特飲㖭！上枱時，不禁「嘩」一聲，因為個鍋嘅設計好特別！係鍋中鍋！中間係湯底，配料就放晒喺鍋的外圍，一路食一路將配料推落去，好過癮！
帽子火鍋陣容鼎盛，包湯底、配料和飲品。
記者試食報告
湯底：
湯底有麻辣肥牛、鮮茄肥牛同香菜濃湯肥牛鍋等選擇，我揀咗皇牌麻辣肥牛鍋，餐牌上仲教你點食最滋味：先加入部分配料，品嚐一下麻辣味，然後加入番茄，加添酸甜味道，再加入米綫，食盡湯底精華！麻辣湯底夠辣，食完嘴唇有種麻麻痺痺嘅感覺，但喉嚨不算熾熱辛辣，做到「麻而不辣」，食得過癮。
配料：
跟餐嘅十幾款配料如蘿蔔、豆卜、冬菇、米綫等，應該先放，可以吸湯！食落頗有麻辣勁之餘又多汁。肥牛質素不俗，有肥膏位，質感軟滑不韌。其他配料都係一般大路貨色，中規中距，勝在大堆頭，大胃王都唔使擔心，一定夠飽。心多多想食多啲，又可以加錢追加火鍋配料。
飲品：
通常鍋物只跟一杯汽水，但呢個鍋物 set 可跟一杯餐廳特飲，抵讚！有好多選擇，包括水蜜桃茉莉花茶、芒果鐵觀音、青瓜豆漿、青檸梳打、椰汁紅豆冰及忌廉菠蘿梳打；必飲推介有青瓜豆漿，微甜，豆味濃郁、仲有清新的青瓜香氣，解辣最啱。
米線陣
地址：樂富聯合道 198 號樂富廣場 1 樓 1112 號舖
電話：2760 7817
營業時間：7:30am-11pm
註：不設加一
文、攝：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
