呢對「拖鞋」，其實是芝士餅！「鞋身」是綿綿滑滑芝士餅，「鞋帶」是抹茶朱古力，好得意！這是元朗甜品店 Wins Goodies 的 signature item；老闆 Wins 曾於 Ritz-Carlton 和九龍香格里拉大酒店當過行政餅廚，手藝紮實之餘，最擅於玩創作。去年推出這「拖鞋」，分別有芝麻味和柚子味芝士餅，大受歡迎，今年再下一城，加添新素。
如果喜愛 cheesecake，必試柚子味，綿密的芝士餅中食到柚子果肉和香味，芝士味只作點綴，不奪果味風頭，食晒成隻「拖鞋」都不覺膩。芝麻味呢，每一口都有芝麻香，想不到同芝士咁夾。今年新推出的，是變奏版 flip flop，Wins 將芝士餅變成雪葩，食落更冰涼清爽！紅白色，是雜莓配搭菠蘿椰子水做成的雪葩，酸酸甜甜果味很重，so refreshing！旁邊至於拖鞋下面的「沙」，也做得有心思，是曲奇餅碎和辣椒朱古力！用來伴雪葩吃，加添口感層次。新版本「拖鞋」加足碼，伴一個以血桃和椰子水做的布甸，淡淡甜香，配上青檸啫喱碎吃，感覺很清爽；加上旁邊以分子製法做成的薄荷粒粒，清涼感大增。Wins 說：「除咗拖鞋外，希望旁邊的配搭都有驚喜，令大家食出不同味道。」
（上）柚子芝士餅 $48，酸酸甜甜很開胃。
（下）芝麻芝士餅 $48，芝麻味濃郁，配搭芝士，又是另一種感受。
Flip Flop $88
確實驚喜處處，每一口都有不同味覺的衝擊，尤其是辣椒朱古力及薄荷粒粒，唔好走漏眼。
Wins Goodies
地址：元朗又新街 33c 號 9 號地舖
電話：5545 8328
營業時間：星期二至日 2pm-6pm，7:30pm-12mn，星期一休息
文：Theo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
