老牌食店近年因加租及後繼無人等因素相繼結業，好似屹立於沙田區 66 年、以紅燒乳鴿馳名的楓林小館、90年歷史的中環民園麵家，早前連開業 33 年的尖沙咀好時沙嗲，亦因加租及相應問題，宣佈結業，一班老顧客既感婉惜又着急，大排長龍，趕在最後日子幫襯，以行動支持良心小店。
可能因此感動到老闆？定係感到到業主？結業咗一陣子，好時沙嗲宣布會翻新重開。重開後的好時，招牌比以前更明亮搶眼，更增設電腦取飛攞位服務，不過人人聞風而至，晚市閒閒哋等一個鐘。
打通 5 個舖連走廊，地方闊落咗好多同光鮮咗，不過座位依然都係密質質。不過熟客們都不介意，逼住食都咁開心。食物款式同以前差不多，價錢就略略上調。招牌海南雞飯，感覺很亮澤，雞肉有雞味之餘，浸煮時間剛剛好，雞皮爽，雞肉嫩滑，肉與皮層仲有少少脂肪啫喱；油飯亦吃到雞油香和香料，粒粒企身，包住一層油；同以前一樣，辣椒醬、薑葱蓉和又甜又杰的豉油，正宗做法無變。雜錦沙嗲，同樣有雞牛豬 3 款口味，食落依然有炭香！靈魂沙嗲醬顏色好靚，有濃濃花生香味，夾埋肉香，惹味到令人一吃再吃，串燒一打接一打！喇沙呢？椰汁與喇沙咖喱的比例恰到好處，湯頭厚薄啱啱好，既食到濃惹香辣味，又有少少椰香味滲出，配粗身米粉、豆卜和魚蛋，都算高分（如果有埋螄蚶更好），配一杯足料珍多冰，大滿足。
食物整體 keep 到水準，甚至比以前提升咗，抵讚。服務也合格，老闆張生滿場飛，同以前一樣咁 nice，佢話開業以來，日日客似雲來，做到無停手。大家想重拾好時好味道，嚟到要畀啲耐性喇。
除了主舖外，還在對面租了個單位招待食客，希望紓減人潮。
海南雞飯 $53
招牌海南雞飯，先用雞骨熬成的上湯浸熟原雞再去骨，伴上豉油、薑蓉和辣椒醬，肉質鮮嫩帶油香，連蔡瀾、蕭芳芳和任賢齊吃過都讚好；重開後水準依然。
隨海南雞飯奉上的三款醬汁，各有不同，辣椒醬和薑蓉夠鮮香，豉油是又厚又甜的一種，正宗。
雜錦沙嗲 $49
串燒以自家配方醃製 24 小時，特別入味，連沙嗲都是自家調製，以辣椒、香料、花生及阿參醬調配而成，百味紛陳又濃香。
喇沙 $49
極香椰汁及咖喱香味，又帶微微鮮味，忍唔住整碗湯飲晒，粗米粉好彈牙。
珍多冰 $20
椰奶味甚濃，大大杯又夠足料，性價比極高。
好時沙嗲
地址：尖沙咀東部好时中心一樓 144-148 室
電話：2739 9809
營業時間：12nn-10pm
文：Theo、攝：Ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
