大埔墟街市超平點心 釗記
大埔墟街市熟食中心出名多好嘢食，居於大埔嘅阿澤都好識窿路，見佢間唔中就到街市嘅「釗記點心小廚」歎點心，食碟牛肉球同雞扎。小記中午 1 點去到釗記，發覺為時已晚，如果想跟阿澤咁食大件又抵食點心，記得要早！早！早！好彩仲有最後一碟牛肉球畀我叫到，睇落同其他街外嘅無乜分別，但食落就知足料，牛肉多，粉較少，只係 $12 一碟，算係好平好抵食。
牛肉球及排骨盅頭飯，埋單都係三十幾蚊落樓。
牛肉球少粉多牛，三粒賣 $12，超抵食。
講到抵，牛肉球都唔夠個排骨盅頭飯（$18）抵食；廿蚊有找！排骨鋪滿碗面，落豉油食勁有風味。再加茶錢每位 $5，一盅兩件，埋單都唔駛 $40。
想跟阿澤咁食一盅兩件，記得中午之前嚟，下午同夜晚只供應碟頭飯和小炒小菜。
落單紙就係食物價錢，盅頭飯都係 $18，超值價。
臨近選舉，好多政黨宣傳海報貼滿牆壁，阿澤歎茶睇見會唔會火爆？
街市熟食中心格局，座位是固定的，唔會迫迫狹。
釗記點心小廚
地點：大埔鄉事會街 8 號大埔墟街市及熟食中心 2 樓 CFS24 舖
電話：9184 7229
營業時間：6am-10pm
大埔買古董酒 貓咪酒舖
不時見阿澤 post 「放毒」相上 facebook，好似炒幾味、煮海鮮，聽街市對面「張記國際洋酒」嘅林生講，阿澤得閒就會去街市買餸，然後就去張記睇吓有無心水靚酒。「佢多數都係睇古董酒，傾酒經都係講番細路仔時候嘅回憶。」
咁阿澤帶過乜嘢靚酒歸家呢？林生隨即攞咗幾枝介紹番，好似有 82 年「白馬威士忌」、70 年代白蘭地長頸 F.O.V.，兩枝酒年紀都唔細。「其實阿澤都係個好精明嘅酒友，如果價錢同質素唔成正比嘅，幾有名氣佢都唔會買，哈哈哈。」識得飲，一定唔只睇名氣。
其實張記酒舖喺大埔仲有樣嘢好出名，就係出名有愛心喇！小記成日見到幾隻肥貓喺酒舖內自出自入，神情寫意，林生話其實係來自九龍坑嘅流浪貓，會不時放上大埔 facebook group 供領養，各位有心人可以多多留意哦！酒舖嘅貓氣，係咪吸引養咗愛貓 momo 嘅貓奴阿澤注意呢？
Smokehead 18 Single Malt Scotch Whisky $1,680
18 年單一麥芽威士忌，泥煤味很重。
1982 年白馬威士忌 $700
屬混合威士忌，當年由渣甸洋行代理，是 150 週年特別版。
「長頸」F.O.V.老牌干邑 $2,800
產自 70 年代，林生指一般都用松木酒塞，但這枝酒用鐵蓋，因為 73、74 年時歐洲有芽蟲禍患，木材都被蛀蝕，故改用鐵蓋。
張記是大埔區老字號，店內放售很多古董靚酒。
除了極流行的威士忌以外，店內還有干邑、白蘭地、紅白酒有售。
張記國際洋酒（大埔店）
地址：大埔鄉事會街 15 號地下
電話：2650 8528
營業時間：10am-8pm
facebook：www.facebook.com/wsguide
$17 杯仔雲吞 勁香蝦子撈 老店
貼地阿澤去大埔最愛蒲屋邨街市，係 fb 上都見佢推介過大元邨街市嘅「老店」，招牌上除咗寫「大埔墟豆腐花」，仲有「首創杯仔雲吞」，小記就跟阿澤推介試咗碗撚手「杯仔雲吞」，果然無老點，細細粒肉味夠鮮，十足傳統細蓉質素。另外又食咗碗「蝦子撈麵」，蝦子夠香口，麵條咬落彈牙無鹼水味，屋邨小店算係超班作！
杯仔雲吞（淨雲吞） $17
蝦子撈麵 $32
舖內有少量高枱椅座位。
老店
地址：大埔大元邨街市商場 401 號
電話：從缺
營業時間：10am-6pm
大埔友都讚紫薯手抓餅 大埔友手抓
食勻大埔，以下呢間就唔係阿澤推介，不過佢嘅手抓餅性價比甚高，就係「大埔友‧手抓餅專門店」，小記見到老闆 Kidman 示範整嘅紫薯蓉手抓餅，咬一口條條紫薯纖維，絕對係真‧紫薯蓉，真材實料，好香甜啊。
紫薯蓉手抓餅 $25
手抓餅鋪滿足料紫薯蓉，咬落好香甜彈牙。
紫薯蓉係用紫薯逐個刨絲，唔係用粉開出嚟咖。
手抓餅外層好甘香，唔會油淋淋，內裏紫薯蓉香滑，不太甜，作為下午小點一流。
大埔友‧手抓餅專門店
地址：大埔廣福道 103a 鋪
電話：6626 8818
營業時間：1pm - 1am
facebook: 大埔友‧手抓餅專門店
文：Celia、攝：Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
