假日去銅鑼灣血拼或捉精靈，喺人潮空湧的商場走出嚟，我都會花多少少腳骨力，或坐叮叮入跑馬地歇一歇。幾分鐘車程腳程，就可以從人多車多嘅旺區出走，由繁鬧步向閒靜，感覺好唔同架。
有時間，我仲會來 tea 一 tea。去邊？街市囉！唔好噓我住！跑馬地街市嘅熟食中心，同一般街市好唔同，餐枱唔多，而且排得井井有條，唔會坐得迫迫狹狹。環境亦出奇地寧靜同乾淨，可能客人大多係中產，好少大呼小叫。街市仲有陽光透入嚟，感覺好舒服開揚。所以呢區嘅富貴街坊、名人明星都鍾意嚟呢度。熟食中心有幾個檔口，我最喜歡昌記。有乜好食？特別推介砂糖厚多士、雪菜肉絲同蛋白碎牛炒蛋呢三寶。
厚多士有成 2.5 吋厚，超霸氣！最特別係配上舊派人好鍾意食嘅牛油與砂糖，當然你可以轉番奶醬或油占啦。厚疊疊，烘得外脆內軟，牛油甘香同砂糖香甜夾埋一齊，好正！雪菜肉絲係自家醃的，爽口鮮味唔會一味死鹹。蛋白碎牛炒蛋簡直係呢度亮點，符合富貴人家追求健康嘅生活態度。炒蛋做到好似蛋餅咁脆咁香！配一杯濃滑奶茶，唞下歇下，又返銅鑼戰場血拼過！
厚多士
雪菜肉絲
蛋白碎牛炒蛋
環境乾淨整潔，亦比一般街市熟食中心寧靜。
昌記
地址：跑馬地毓秀街 2 號黃泥涌市政大廈 2 樓 1 及 5 號
電話：2573 5910
營業時間：7am-6pm，星期日休息
(原文摘自 U Maazine ISSUE 429)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
