源興美食隱身於新填地街市牌檔中，位置毫不起眼，要穿過鐵皮豬肉檔、菜檔的窿罅才看得見。夜晚未夠 7 時來到，陳設簡陋的小店內，已擠滿客人，非常熱鬧！
這裏中午賣大路碟頭飯，晚上辦私房菜，每人 $300 吃足 10 道菜，賣的是傳統手工菜，還有枱枱必點的鎮店燒味，除了本地客，仲有不少識得捐窿捐罅搵食的日本、台灣遊客慕名而來。咁受歡迎，全因出品用心。
老闆兼大廚林福源出身自鵝頸橋海記及清真惠記，其後又於多間大酒樓包括利苑、陶源酒家等擔任燒味師傅，有近廿年經驗，除了堅持每日親自去油麻地街市選料、醃鵝燒鵝，絕不假手於人外，店內用的豉油、山楂醬、叉燒醬等都是自家製。源哥的燒鵝只用鵝公，因脂肪較鵝乸少，肉夠厚，味道亦較香，依其家鄉新會古井的醃法，只用香料不落醬，可食得出鵝肉原來的鮮味，原汁原味，加上待客人來到時才即燒，包保吃到的都是新鮮出爐燒鵝。趁熱食，入口皮脆肉香，肉汁豐腴甘香，非常好吃！頭抽鴿皇也有驚喜，用的是味道更濃的頭抽，加入新會陳皮、香茅、薑、冰糖等煲上一大鍋來浸鴿，鴿肉滲滿豉油的甜香，連骨都入晒味，吃得嘴舔舔。
除了燒味，手工菜也是這裏的一大賣點，像糯米釀雞翼，雞翼先拆骨，再釀入由生炒到熟的糯米飯，臘味落足料，啖啖甘香；蜜汁燒鰻魚，只取腩位啖啖肉最靚的一段，先用鉗仔起骨絲，用海鮮醬、麻醬等醃成，然後吊起風乾 6 至 8 小時，令肉質收緊，燒起來外皮零舍脆身，魚肉食落彈牙鮮美，每一口都是心機。
最抵讚是價錢大眾化，手工菜連燒味私房菜每位 $200-$300，價錢唔貴。不過由於店內只有源哥及另一位師傅，人手有限，準備工夫又太花時間，所以大部分菜式都是限量，想吃就要預訂。
頭抽鴿皇
選用最高級的頂鴿，以頭抽浸熟入味，鴿肉鮮嫩，帶陣陣豉油的甜香。
蜜汁燒鰻魚
只取厚肉的腩位，表皮香脆，肉質香軟，充滿蜜汁的甜香，沒半點腥味，很惹味。
翡翠珊瑚花
凍食的頭盤，以陳醋、香蒜油、芫茜、唐芹等拌海蜇頭，口感爽脆，酸香開胃。
鎮店叉燒皇
叉燒除一般醬料，還加有花雕醃製，酒味香得來又不會蓋過肉味，表面帶焦香，入口鬆化軟腍。
秘製家傳豬手
炆豬手是源哥外婆傳下來的秘方，用花椒、八角、香茅及秘製醬汁炆至完全入味，外皮爽脆而不膩，墊底的花生也要分開炆 6、7 小時至軟腍，甚花時間。
糯米釀雞翼
雞翼外皮卜卜脆，內裏的糯米飯自家生炒而成，啖啖充滿臘味的油香。
必食！明爐古井燒鵝
熱騰騰的出爐燒鵝，皮脆甘香，肉汁豐富，即使是胸位也不會乾爭爭，香料味恰到好處，吃得出鵝肉原來的味道。
| 必食菜單（6 位用，$300/ 位） 翡翠珊瑚花 鎮店叉燒皇 蜜汁燒鰻魚 秘製家傳豬手 糯米釀雞翼 明爐古井燒鵝 古法醬汁蒸老虎斑 椒絲腐乳炒通菜 杏福白肺湯 芒果布甸 |
源興美食
地址：佐敦新填地街 63 號地下
電話：2711 1311
營業時間：11:30am-10pm
註：私房菜須一天前預訂，每位 $200 起，最少兩位
(原文摘自 U Magazine ISSUE 452)
相關報導：
60 年街市樽仔奶茶 當年點解用樽仔？
下欄當上菜 街市絕好車仔麵
歡迎你 like 我哋 U Food Facebook Page / U Food Instagram ，取得我哋更新更快嘅資訊！
