去茶餐廳開飯，夥計通常先拎杯水放你枱面，嗰隻淺啡色透明嘅膠水杯，你有無印象？睇下杯底，即見到紅 A 標誌！ 七八十後嘅朋友，應該對紅 A 生活用品好熟悉，而家睇番，唔會覺得佢娘，反而有種親切感同情意結。
先講下紅 A 故仔畀大家聽，佢本身為「星光實業有限公司」，在 1949 年創立，最初生產清潔刷類產品，到了 50 年代人口漸多，轉攻當時得令的塑膠產品工業，例如 60 年代大制水，令紅 A 水桶頓成家傳戶曉；返學用嘅書篋、街市照雞蛋燈罩、沙灘浮波，產品多元化，圍繞住大家生活。
當然，有盛自然有衰，到 80 年代個個北上發展，隨後 90 年代就更寂靜了，但紅 A 依然選擇留守香港。「我覺得 Made in HK 係正嘅，仲係好有價值㗎。」Jessica 由小到大從未染指家族塑膠生意，6 年前由於家人召喚而歸隊。「如果紅 A 就咁消失，我覺得很可惜，所以決定幫手。」要接火棒唔簡單，Jessica 回朝後努力設計新 line 產品，購入台灣刀器、卡板塑膠代理，仲要保持阿爸一輩務實、安全先推出街，畢竟紅 A 生招牌撐住香港製造嗰朵嘛。
「6 年前接手紅 A，第一個 project 就係搞網絡購物平台，一站式先方便客人。」紅 A 第三代傳人梁馨蘭 Jessica 傳承了爺爺及爸爸一輩風格，務實、低調，但與時並進。「今日香港居住環境唔同往日，人口多、空間小，入到廚房轉個身都困難，所以要設計 fit on 現代人嘅產品。」而家紅 A 嘅家品，既注重實用性，設計上亦花心思，有的與插畫師玩 crossover，有的乾脆玩古老當時興，一啲都唔覺娘，仲好受年輕家庭支持。入佢網站睇，既可重拾兒時回憶，又買到實用嘅生活百貨。
必買 8 款 Vintage 精品
蒼蠅拍 $4
而家咁多蚊又咁多蠓，呢個蒼蠅拍大派用場！買齊 4 色都係十幾蚊貨仔，外型 old school 當裝飾都抵！
雙色印花豉油壺（大） $22
印有經典復刻花紋嘅豉油壺，有紅、黃、綠三色可揀，好似回到七八十年代咁。
啫喱杯 $37（12 隻裝）
你仲會唔會食羅拔臣啫喱？細個時要配埋個透明啫哩杯咖，依家都仲有得買，用嚟食啫哩再加花奶成個 feel 返晒嚟！
水壺 $29/ 個（960 ml）
暴露年齡都要講，我細個係會帶斜揹水壺返學，好似紅 A 呢兩款咁樣樣，一款斑點狗、一款似足球小將，超懷舊。
保暖水壺 $62（680ml）
有發泡膠內層的保暖水壺，塑料符合美國食品及藥物管理局 FDA 標準，安全！綠色外型，好有露營 feel。
酒杯 $43（細）、$53（大）
酒杯通常都係透明，紅 A 出品仿水晶膠杯仲有紅色及藍色揀，開 party 或帶去野餐最方便。
燈罩 $24
去舊式街市抬高頭望，就會見到好多燈罩照耀媽媽們揀橙、揀菜、揀魚同揀蛋，永恆經典紅 A 燈罩仲有得買，都係嗰句用嚟做裝飾都抵。
癲噹 x 漏斗櫈加迷你模型套裝 $680
漏斗凳係好經典嘅紅 A 產品，為咗紀念呢個產品特意搵嚟多個插畫師和設計師合作，其中一個係「癲噹」，推出迷你漏斗凳模型套裝，張張凳手指咁大張，得意！
懷舊睇！舊日紅 A
舊日紅 A 推出的嫁喜系列碗碟，極值得珍藏。
雕花塑膠水壺，好有花樣年華 feel。
紅 A 在 1949 年以生產清潔掃起家。
紅 A 曾生產牙刷用品，當時極為新潮。
70 年代塑膠學生書喼，當年廣告口號係「跌唔爛、踏唔扁，可以當凳仔坐，落雨都唔怕入水。」當時擁有一個喼神，係好自豪嘅事。
見到紅色飯壺及湯壺猶如時光倒流，工廠妹萬歲！
同場加映！實用系家品
摺式碗碟架 $61.9
現代紅 A 有好多新 line，其中 「CRE-A」推出很多適合現代家庭設計的產品，「摺式碗碟架」體積輕巧，附設隔位擺放碗碟及餐具兜，可摺合收藏，慳位！
五合一量匙 $16
可一次過量度不同單位容量，有 4 個容量單位：半茶匙、一茶匙、半湯匙以及一湯匙的單位，中間的圓孔部份更可量度一人食用意大利麵份量，一物多用。
花型隔篩漏斗（3 件裝） $25
花型隔篩漏斗兼備隔渣功能，花朵中央是小隔篩，能將細小渣滓隔開，膠材料符合 FDA 標準，隔冷熱飲料都食用安全。
「CRE-A」活動式筲箕 $39
底部可調節不同大小排水孔，方便清洗不同類別的食物，同時兼作洗菜盤及筲箕，一物兩用。
新蒲崗大有街一眼就見到紅 A 大廈，低調得來又搶眼！
紅 A 網購平台方便購買經典紅 A 產品，安坐家中就可以掃貨。
星光實業有限公司．網上商店
網址：www.reda.com.hk
facebook：紅 A 塑膠用品
電話： 3798 8788
文：Celia
歡迎你 like 我哋 U Food Facebook Page / U Food Instagram ，取得我哋更新更快嘅資訊！
