原來打造此店的，是上海生煎皇老闆 Oscar，今次聯同 2 位兒時好友 Eddy 同成一齊開店，3 個大男孩嘻嘻哈哈走埋一齊決定搵返個開心童年，所以 3 人將自己珍藏嘅巨型皮禮士糖、Chucky 公仔同 Eddy 之前工作的矽膠設計產品放晒喺度，打造出呢間上樓蛇竇。
三個大男孩話開心最重要，做了個瘋狂舉動，就是幾近蝕大本賣龍蝦卷同原板海膽飯。$118 食到波士頓龍蝦不是夢，仲要係游水現宰的，而家大熱原板海膽，他們做得更有心，配咗個海膽飯，成板韓國馬糞膽加落去撈均 $98 咋，2 款食品淨係隻龍蝦同板海膽，成本幾乎等如賣價，叫多幾碟真係食窮老闆。
舖頭仲有特別嘢，就是開店前派了大廚鴻到澳門學習整荷蘭薄餅（Pannekeok），這款薄餅唔係 pizza，雖然都用蛋及麵粉做，不過脆邊位又焦脆，上面鹹甜餡料都可放，香港只有這家供應。另外也供應 slow cook 的肉類及創意意粉，價錢定得唔「乸脷」，蛇唔蛇王都嚟得。除海膽飯及龍蝦卷外，8 月 31 日前設 85 折，好抵食吓！
店主是 Oscar、Eddy 及成（左起），9 歲識到而家，一齊開舖圓童年夢外，更希望帶到開心畀香港人。
海鮮冬蔭公天使麵 $88
冬蔭公膽是自家製的，以辣椒膏、南薑、檸檬葉等炒起，再以魚清湯慢火煮 1 小時，冬蔭公醬加上米醋、芫茜、九層塔及泰式茄了炒香意粉。
菠菜忌廉醬牛油果風乾番茄荷蘭薄餅 $98
薄餅以麵粉、高筋粉、蛋、牛油、奶及呍呢嗱油做，要用人手打起筋再拿去烘，所以比平常的 pancake 更膽更有𡁻頭，就算加上芝士汁也不會浸到腍腍，配鹹吃的餡料，鹹香惹味，但又無 pizza 咁滯。
紐西蘭羊扒配迷迭香燒汁 $198（8 安士，配廚師精選薯菜）
羊扒加了 rosemary 60℃ 低溫慢煮 45 分鐘，肉嫩又入到香草味，連配搭的燒汁都是自家用牛骨低溫熬製，牛骨以 58℃ 熬 1.5 小時，濃香惹味，另有低溫慢煮的牛扒及鱈魚。
原板海膽撈炒飯 特價 $168
為咗大家開心，這個幾乎是無錢賺地賣，飯是意大利飯加海鮮湯及海膽煮的，熱辣辣地加進原板海膽撈勻吃，原價是 $198，淨係板韓國馬糞海膽已佔了 6、7 成本。
龍蝦即叫即劏，仲要係藍龍蝦，特別矜貴鮮甜。
波士頓龍蝦荷蘭薄餅 特價 $208
這味原價是 $258，隻 1 磅 4 安士的波士頓龍蝦成本已超過 $150，但老闆照樣平賣，游水龍蝦現宰起肉，跟帶子、白菌、洋葱及蒜炒香，放到荷蘭薄餅中，配芝士忌廉芥末子汁，龍蝦肉味道勁鮮，彈牙度比冰鮮貨正好多。
舖頭是潮人 cafe 格局，少少隱密，勁好蛇。
舖內仲放了不少店主珍藏玩具，kidult 味出晒。
Candies Foodies
地址：尖沙咀樂道 36-50 號華源大廈 1B-2B 閣樓（樂道 7-11 對面）
電話：2563 3332
營業時間：12nn - 10pm
收費：只收現金，設加一
交通：港鐵尖沙咀站 A1 出口，步行 3 分鐘
泊車：iSquare $35 hr
平均消費：午巿 $80、晚巿 $200
備註：意粉、扒類、荷蘭薄餅加 $10 配湯或飲品、加 $25 配特飲或湯）
文：sieg、攝︰Suki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
