呢間位於元朗的食店，叫「文樂美食小炒王」，主打燒味及小炒，係元朗區出名的良心食店。良心嘅嘢可以好簡單，收得錢就畀番應有價值的食物你；呢間舖就做到，所以深受街坊支持。
佢嘅招牌五寶飯係元朗人的重點推介，五寶包括燻蹄、紅腸、燒鴨、切雞同燒肉！齋餸料已經鋪滿成碟飯，差啲連飯都睇唔到！而且可以厚切都厚切，燻蹄爽口，紅腸大塊，燒鴨不過不失，切雞都算啖啖肉，燒肉皮脆，層層分明，食到有肥有瘦。最驚喜係飯底，炒飯底不特止，仲唔係普通蛋炒飯，仲食到叉燒粒同蝦仁！每碟 $68，係比一般燒味飯貴一截，但論用料和分量已交足貨，足夠兩人食得飽，不貴了。
招牌五寶飯 $68
一上枱，畀大堆頭嚇親！紅腸、切雞、燒鴨有一般燒味店的水準，燻蹄非常爽口，而燒肉的皮亦脆卜卜，好食。
打橫睇，飯連餸堆到成個小山丘咁，淨係飯已可裝滿 3 個碗，分量驚人，足夠兩個人 share 食。
炒飯即叫即炒夠鑊氣，而且配料超多；真心，淨食炒飯已經好滿足。
文樂美食小炒王
地址：元朗金輝徑 33-41 號金禧樓地下 1 號舖
電話：2760 0811
營業時間：11am-11pm
文、攝：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
