白家陳記嘅粉絲有多款不同口味，統統都設包裝同杯裝，最初以為包裝係要煮的，原來都係沖熱水就食得，超級方便！除咗辣味肥腸味粉絲，品牌仲有好多唔同口味辣粉絲，好似酸辣、麻辣、酸菜魚味粉絲等，究竟邊款最好味？
肥腸味粉絲：真係有肥腸味！
各位應該都同小編一樣，對「辣味肥腸味」感到好奇！泡法與一般杯麵差不多，內有粉絲、調味粉和辣汁；加調味包、沖熱水、焗 5 至 6 分鐘食得！打開蓋，湯底顏色好紅卜卜，面層有一層厚厚嘅紅油，好嚇人！果然真係透出點點肥腸嘅內臟氣味，湯底係薄身嘅，粉絲不算很掛湯。呷一口湯，真係有似豬大腸、鵝腸嗰種油溢感和味道，但不算濃烈，反而辣味較搶鏡。可惜冇餸料，如果真係有埋豬大腸 / 鵝腸嘅話，就堅邪惡喇！
正宗酸辣粉絲：辣味溫和
酸辣粉係白家陳記皇牌產品 no.1，日銷過萬！睇睇配方，有自家調配嘅秘製辣汁、陳年食醋、香葱等配料，似模似樣。一打開包裝就已經聞到強烈嘅酸辣香味，建議要喺空氣流通嘅地方「開包」！
除咗杯麵包裝，另設即食包裝，材料、湯包等完全相同！
唔好以為國產嘢就一定難食、質素差，沖完水之後一睇，火紅色嘅辣湯好睇得，與一般街頭食開嘅傷心酸辣粉無異，用叉一舀起，粉絲沾上不少辣粉，以為好辣，入口卻唔太辣，唔使馬上飲水，加上酸咪咪，就算不嗜辣都入到口。粉絲食落爽口，口感亦滑溜，有別於香港食到嘅粉絲，比較粗身，吸收咗湯底嘅酸辣味，深夜想吃酸辣粉都過足癮，建議自己加少少花生或芫茜吃，更香！
麻辣燙粉絲：激麻激辣
嗜辣之人如果嫌酸辣不夠刺激，可以晉級挑戰比酸辣更辣嘅麻辣級別─麻辣燙方便粉絲！聞起嚟雖然無酸辣咁惹味，但一入口，極具爆發力嘅辛辣味道即時湧現，辣度很有層次，除咗感受到喉嚨火般灼熱之外，嘴唇亦隨即有種麻痺感覺，果然夠麻夠辣！可以滿足到嗜辣嘅朋友仔！
酸菜魚味粉絲：有配菜！
杯麵裝內有叉子，啱晒懶人一族！
酸菜感覺很 fresh，也很有咬口。
本來對酸菜魚味不抱期望，但打開包裝時見到有酸菜包，有驚喜喎！原來呢碗「酸菜魚味方便粉絲」是有餸菜嘅！加水焗完後，湯底唔係鮮紅色，而係好似酸菜嘅淺啡色，呷一口，醒胃得嚟又帶魚湯味道，而酸菜睇落並唔「霉」，食落有咬口，味道不太酸，個人認為酸番少少更好！粉絲盡吸酸酸嘅湯汁，好開胃，無一般酸菜嘅怪味，值得畀 like！
各款方便粉絲
價錢：$4.8（包裝）、$7.2（杯裝）
售賣點：澳門新苗超市
查詢：(853) 2884 4766
註：除咗澳門，大家可以喺偉大嘅淘寶網購買，不過太多店子須要格一格價先好買！
文：Joyce、攝：Keeyau
歡迎你 like 我哋 U Food Facebook Page / U Food Instagram ，取得我哋更新更快嘅資訊！
