好飲嘅奶茶，一般都喺老冰室或茶餐廳搵到，但我最心水嘅奶茶，就係上環街市熟食中心內嘅瑞記。 呢個老茶檔，開業 60 多年；老闆張伯伯年過 80，細細粒，好鬼馬，每次叫一枝奶茶都無限量附送笑容；街坊熟客到來，總愛與他打牙骹。以前聽他說過，他十來歲在急庇利街牌檔執頭執尾、擔水做小工，後來老闆成個牌檔轉讓給他，奶茶一沖就 60 年。
花盆上的小詩寫了張伯伯「勤儉」與「安道」的個性。
忌廉樽仔已是第三代樽仔了。
點解用汽水樽唔係用杯裝奶茶？原來同電車司機有關！話說當年無紙杯，電車司機鍾意攞個牛奶樽去牌檔裝住奶茶，開工時放喺電車頭慢慢歎，後來用「安樂汽水」樽裝，到 80 年代興忌廉溝鮮奶，載奶茶的樽就變成忌廉樽，一直用到而家。
沖凍奶茶，每轉都用明火煲熱，逼出茶味。
4 號 Lipton 茶葉，用足 60 年。
當然啦，用樽仔裝奶茶除咗得意和特別之外，受歡迎終歸因為瑞記做得好飲。奶茶配方整個甲子也沒變過，用 Lipton 4 號茶葉沖製，而且唔似間撞茶，反而每溝一轉都用明火煲茶，再加糖、黑白奶沖茶入樽，即沖即入；茶味濃得來，又嗒到奶的幼滑。60 年來唯一變化就係以前無雪櫃，要用碎冰冰鎮，而家則用冰櫃雪足一晚，奶茶凍到入心，而且由頭飲到尾茶味都好濃郁。
奶茶已加糖，揼本用黑白淡奶，又香又滑。
奶茶沖好後即刻入樽，再放到涼水中浸凍後入雪櫃雪一晚，飲落透心涼。
久不久奶茶心癮發作，久不久想起老伯伯的笑容，就想到瑞記走一趟，從厚實的玻璃樽，從濃濃茶香，重拾舊時人的閒情。
瑞記咖啡
地址：上環皇后大道中 345 號上環市政大廈 CF17 號舖
電話：2850 8643
營業時間：6am-5:30pm
（原文摘錄自 U Magazine issue 353 ）
歡迎你 like 我哋 U Food Facebook Page / U Food Instagram ，取得我哋更新更快嘅資訊！
