本鮪拖羅真係超貴，但人一世，物一世，無理由唔試一次啩，想錫住個薄薄嘅荷包又想做大豪客，推介你嚟呢間樓上刺身壽司店，吃到最高級的大拖羅丼，都係 2 張紅衫魚咋，平民能負擔，今晚即 go。
喺香港高檔少少嘅迴轉壽司店吃，2 張紅衫魚，充其量都係食到 4 片中拖羅咋，但喺呢間舖，食嘅卻係睇高一綫嘅頂級大拖羅。
我知口癢友一定會挑機，拖羅賣得咁平，斷估係台灣嚟嘅冰鮮貨？sorry，你真係徹底地錯。畀我拍到廚師親手肢解吞拿魚，是逢星期三及六跟吞拿魚入口商 Yume Maguro 直接取來外國漁場的原條藍鰭吞拿魚，即捕即放血搭飛機來港，正值炎夏，舖頭就用在寒冷澳洲捕捉到的藍鰭，冬天仲勁，用朝捕晝送的日本本鮪。
這裏的丼飯主要用上大拖羅、中拖羅、赤身 3 個部分，吞拿魚腩蓉則用劏魚腩的碎肉及脂肪混合而成。有圖有真相，今次拍的大拖羅丼，老闆說是近骹位的位置，顏色肉質味道油香都是一級棒，每條魚只有 1-2 份，油花超密，魚油激多，有高檔日本料理甚至會將這份當「特選大拖羅」賣，乘機賣貴一級，但這裏益食家，大拖羅幾靚都賣同一價錢，大啖咬，條魚就入肉，你就唔入肉。
大吞拿魚腩丼 $180
超級強勁無敵地抵吃，一碗有 4 塊厚切、每塊有 18-20g 的大拖羅魚腩，平時你去高級啲的迴轉壽司店已經是這個價錢。新鮮切出的脂肪分布細密，軟嫩無渣，化開之餘也略有𡁻頭，甘香到牙骹軟，魚油滲進飯裏，啖啖鮮味。飯都不俗，用日本七星米及澳洲穗之香米，圓潤富彈性。
吞拿魚腩刺身丼 $148
如果鍾意魚味重的，應該揀這款，3 片赤身加 2 件中拖羅，赤身魚味十足，中拖羅吞拿魚味濃郁，入口嚼感不錯，也帶甘香的魚油味。
葱吞拿魚腩海膽丼 $138
拖羅蓉加海膽係無得輸嘅，拖羅蓉啖啖魚肉，不會只有肥膏，上面放了韓國馬糞海膽，海膽軟滑，撈埋油份十足的拖羅蓉吃，扒晒個飯。
淺漬吞拿魚丼 $90
一碗有 6 塊赤身，以自家調的醬油淺漬過，醬油香好柔和，夾起魚味中度的赤身，更加惹味，一咬即斷，沒有太韌要狂𡁻的問題。
特選鮪盛 $180
貪心仔想試晒 3 款要揀呢款，一份有齊大拖羅、中拖羅及赤身，每塊刺身約 15g 左右。
餐廳每星期會空運原條澳洲藍鰭吞拿魚（冬天則用日本藍鰭）回來劏，逢星期三、六返貨，隔日來就能吃到超新鮮的拖羅。
家賀屋
地址：灣仔灣仔道 83 號 1 樓
電話：2836 6466
營業時間：星期一至五 12nn - 3pm、6pm - 11:30pm，星期六 1pm - 4pm、6pm - 11:30pm，星期日及假期 6pm - 11:30pm
收費：現金及信用卡，設加一
交通：港鐵灣仔站 A3 出口，步行 5 分鐘
泊車：大有商場 $33 hr
平均收費：午巿 $100、晚巿 $200
文：Sieg
(原文摘自 U Magazine ISSUE 558)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
