咁大份咪好貴？Sorry 啊，老闆同你講心唔講金，自我割喉放血 $198 賣畀你，當你在港九啲中檔港式日本料理食碗刺身飯都 $200，形容佢 CP 值爆燈，都不為過。
元朗搵食有乜好，收費平民囉，好似呢個開心價二段丼「究極丼」，數下刺身有幾多種先，上層有鱈場蟹箝、海膽、劍魚腩、帶子、油甘魚、三文魚、吞拿魚、蟹子、三文魚子、甜蝦、蟹柳，中間仲有個一小杯蕎麥麵，嘩！10 款、係 10 款配料呀，而且唔係來歷不明、無味的劣質刺身，老闆曾生與黎生話貨比三家，搵嚟優質的刺身，講優質，係無諗過平民丼飯店，居然搵到供應商由築地送魚生來，海膽用酒店級的北海道安安海膽、吞拿魚用日本藍鰭的中拖羅、仲有日本甜蝦，仲不時 pop up 啲時令刺身，如鱲魚、左口及八爪魚等，上層放魚生片、下層用角切，淨食上層 CP 已爆標啦。
這店價錢真係有優勢，因為我差啲唔記得講，究極丼已是全場最貴嘅丼飯，想慳啲啲但仍然保留貴族享受，UM 肥媽推介你吃「蝦皇丼」，或者阿拉斯加同日本鱈場蟹合璧的「蟹皇丼」，究極丼外，這裏嘅丼飯有分大盛及標準 2 個 size，大盛木盒如月餅罐咁大，飯量配料量是標準 size 的 1 倍，但價錢未必係標準 size 1 倍喎，好不合邏輯。
假如，你呢期銀包真係堅燶，嚟呢度開飯一定好過去茶記，這裏最平嗰款標準 size 火炙三文魚飯才賣 $68，蝦皇丼及蟹皇丼都係分別 $88 及 $78，仲要無加一，吃魚生飯吃到咁經濟實惠，無嘢講啦，我都係低頭扒埋碗抵吃刺身飯先。
究極丼 $198
一共 10 款，上層是原片魚生片，油甘魚煙韌鮮味，劍魚腩𡁻頭好，蟹箝超甜，日本海膽是入口融化又甘甜的，而下層將角切三文魚、吞拿魚、青瓜、蟹柳撈均，油潤香口，加埋醋酸味啱啱好嘅壽司飯食，清新唔膩，飯量多，最好孖住朋友開心些牙。
(左) 蝦皇丼 $138
大盛版本淨係蝦都有 10 隻，包括最高級的日本牡丹蝦、甘蝦、沙律醬蝦及櫻花蝦乾 4 種，飯內還有蟹柳絲，雖然全都是蝦，但甘甜層次不一。
(右) 蟹皇丼 標準 $88
標準 size，分量都唔少，有阿拉斯加蟹蟹肉、日本鱈場蟹肉、蟹膏及蟹箝，蟹肉十分足料，一梳梳有咬口，蟹味鹹香鮮濃，撈埋蟹膏更加甘香。
精選五目丼 標準 $110、大盛 $198
包括三文魚、劍魚腩、油甘魚、拖羅及時令鮮魚，今期八爪魚，另外仲有甜蛋，大盛版每款魚生有 2 片，好澎湃。
縱使舖頭收費不算貴，老闆曾生（前）及拍擋黎生挑了很多個供應商，找來高質又中價嘅魚生。
晚巿基本上日日爆，都要排一陣先入到來歎二段丼。
丼家
地址：元朗鳳攸北街 2-6 號永富閣地下 14B 號舖
電話：5541 0744
營業時間：12nn-3:30pm、6pm-10:30pm
收費：只收現金，不設加一
交通：西鐵元朗站 E 出口，經 YOHO Mall 出，步行 2 分鐘
泊車：交通廣場 $16
平均收費：$100-$120
文：Sieg
(原文摘自 U Magazine ISSUE 558)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
