想睇有乜美食？！即刻睇片：
影片連結：youtu.be/c7CgsRQ-ozo
款式激多！
邊間餐廳咁有諗頭推出綠茶 tea buffet？就係尖沙咀百樂酒店嘅 Park Cafe。下午茶自助餐果然一片綠悠悠，有十多種綠茶甜品任食，好似綠茶豆腐芝士餅、綠茶林明頓、十勝紅豆綠茶卷、綠茶沙巴翁泡芙、綠茶朱古力慕絲蛋糕、北海道 3.6 牛乳綠茶奶凍、綠茶 pancake、綠茶慕絲酥皮卷、綠茶蜜糖桂花糕、綠茶芒果芝士餅等等，不同口味不同甜度不同質感嘅甜品都包攬晒，仲唔滿足到綠茶癡？
令小編最 surprised 嘅，係有綠茶刨冰！大大嚿綠色嘅冰，放入刨冰機製成刨冰，客人更可自行添加糖、朱古力豆、粟米片、朱古力脆脆等 toppings，好好玩！刨冰磨得很幼細，刨成薄薄一片，淡淡綠茶味好清新解渴。另一必食 item 係即焗綠茶梳乎厘，廚師會現場用光波爐即焗，新鮮熱辣，味道唔太甜，有綠茶應有嘅甘味，好彩唔苦澀。除咗綠茶甜品，自助餐內都有「非綠茶」甜品，好似即製嘅蛋白芝士撻，我見唔少人拎完又拎，梗係唔執輸試下啦，果然不俗，芝士香濃之餘，仲有少少流心效果！
罕見綠茶鹹點！
綠茶甜品就食得多，有無食過用綠茶做嘅鹹點先？自助餐一樣有！好似綠茶芝士燒雞翼，賣相係有啲……well you know，怪怪哋，但無諗過芝士味同綠茶味咁夾，淡淡嘅綠茶香氣仲可以中和芝士嘅膩感㖭！
Buffet 始終係 Buffet，首要着重食物選擇，除咗綠茶鹹甜點以外，自助餐內仲有兩三款凍海鮮、刺身、熱食、即煮拉麵及其他甜品供應。小編試食當日，就食到泰國海蝦、新西蘭藍青口、挪威三文魚以及日本鯛魚，款式會不時轉換，用料唔差，食落尚算新鮮。以每位 $200 樓下的下午茶自助餐來說，性價比好高了，如果食物 refill 速度更快，會再加分。
「綠茶花園」下午茶自助餐
供應日期：即日至 10 月 4 日
時間：3pm-5pm
收費：星期一至五 成人 $178/ 位、小童 $158/ 位，星期六、日及公眾假期 成人 $198/ 位、小童 $178/ 位
Park café
地址：尖沙咀漆咸道南 61-65 號
電話：2731 2100
文、攝：Joyce
想睇更多？即上 自助餐 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
