新分店有足足 1,300 平方米，分咗衣、食、住、行、育 、樂 6 大元素，仲要加咗 MUJI BOOKS及 MUJI GREEN 嘅元素，成為全港第一間有書及小盆栽賣嘅無印良品！而 Cafe & Meal MUJI 及 Bakery 則佔地 175 平方米，有多款全新冷熱前菜、主菜、甜品及飲品，麵包款式多到數唔到，即睇有乜必食推介！
食飽先有力 shopping，先去餐廳 Cafe & Meal MUJI 醫肚先。Cafe 裝潢是一貫木系設計，加埋 60 米嘅樓底，空間感十足，感覺開揚舒適。吃的嘛，同樣以日本家庭式菜式為主，主張不時不食，按季節更換當造食材，配合簡單嘅烹調方式製作最簡單嘅菜式，貫徹健康作風。
香煎大蝦配辣番茄醬汁 $158 大廚將越南大蝦煎香，放於用粟米粉及牛奶煮成嘅粟米糊上，淋上香辣嘅番茄醬，酸中帶辣好刺激食慾。
慢煮西冷牛扒配黑松露燒汁 $158 奧海城店率先推出嘅菜式，選用美國西冷牛扒，以低溫攝氏 66 度煮 20 分鐘，肉質軟腍，配濃郁嘅黑松露燒汁，菌香四溢。
慢煮黑毛豬配白菌醬汁 $138 豬肉來自食橡果超過 6 個月嘅西班牙伊比利亞黑毛豬，以攝氏 58 度煮半小時，咬落充滿肉汁，肉香滿滿。
高野豆腐蔬菜千層 $118 日本高野豆腐質地比較實淨，大廚先用菜水浸泡豆腐。然後再鋪上澳洲茄子、羅馬番茄及芝士，淋上白汁焗，香噴噴！
味噌烤鱸魚柳 $138 用日本白味噌將深海智利鱸魚醃製後，以高溫烤熟，從而將魚肉嘅油脂逼出。為咗照顧一家大細嘅客人，奧海城店特設親子套餐及兒童套餐，其他分店都無㗎！
鮮芒果露筍沙律（冷盤） $95/3 款、$108/5 款、$118/5 款（各配湯、白米/十穀米 / 餐包） Cafe 的夏日新菜式以芒果入饌，呢款冷盤（Cold Deli）沙律，將芒果拌以露筍及水耕沙律菜炮製，好 fresh！
烤鯖魚配芒果芥末醬汁 $95/3 款、$108/5 款、$118/5 款（各配湯、白米/十穀米/餐包） 日式烤鯖魚上淋上以芒果煮成的芥末醬汁，酸辣鹹及魚嘅鮮甜集一身。
鮮芒果卷蛋 $45 甜品師用咗日本蛋、麵粉及本和糖製作卷蛋，質地軟熟。中間有厚厚幼滑忌廉及特別選用帶酸、不死甜嘅菲律賓芒果，香甜清新不覺膩。
荔枝紅桑子慕絲 $40 底層是酸咪咪嘅紅桑子慕絲，中間加入脆粒及混入荔枝果肉及紅桑子果肉嘅荔枝味啫喱，充滿夏日 feel！
Bakery 新品！
（墨汁麵包）
（左上）日式薯餅墨汁包 $25、（左下）雜籽墨汁包 $15、（右上）雙重芝士墨汁包 $28、（右下）雞髀菇枝豆墨汁包 $20 新店嘅 Bakery 都有新麵包推出，呢幾舊烏卒卒嘅麵包，係混入咗墨魚汁製作；分別加入枝豆、雞脾菇、薯餅、雜籽及芝士做餡料，吃出不同個性。
(長型麵包）
白味噌蔬菜包 $18 另一款全新口味嘅麵包混合了低鹽份嘅日本白味噌，麵包粉團自然發酵，特別鬆軟。白味噌麵包一共有 6 款，分別有南瓜及茄子、西蘭花及椰菜花、露筍芝士、三色番茄、京葱及洋葱及腸仔片，配搭一啲都唔悶。
無印良品（奧海城店）
地址：西九龍奧海城 2 期地下
電話：3971 3240
營業時間：（店舖）星期一至五 11am-10pm，星期六、日及公眾假期 10am-10pm；
（Cafe & Meal MUJI ）星期一至五 11am-10pm，星期六、日及公眾假期 10am-10pm（Last Order 9:30pm）；（Bakery）星期一至日 10am-9pm
註：8 月 1 日正式開業
文：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
